Innlent

Vantrauststillögu á Jónas í Sjómannadagsráði vísað frá

Jakob Bjarnar skrifar
Jónas Garðarsson er, auk þess að vera gjaldkeri Sjómannadagsráðs, formaður Sjómannafélags Íslands
Jónas Garðarsson er, auk þess að vera gjaldkeri Sjómannadagsráðs, formaður Sjómannafélags Íslands Fréttablaðið/valli

Heldur kom á margan manninn á haustfundi Sjómannadagsráðs á dögunum þegar borin var upp vantrauststillaga á gjaldkera félagsins, Jónas Garðarsson.

Það var Guðmundur Helgi Þórarinsson, formaður félags Vélstjóra og málmtæknimanna, sem vildi leggja þetta fram til umræðu og atkvæða undir dagskrárliðnum önnur mál en erindinu var vísað frá með miklum meirihluta atkvæða. Fundarmenn voru hátt í 30 en fjórir vildu taka málið til afgreiðslu.

Jónas er, auk þess að vera gjaldkeri Sjómannadagsráðs, formaður Sjómannafélags Íslands en þar logar allt í illdeilum sem náðu ákveðnum hápunkti með því að væntanlegum frambjóðanda til stjórnar á næsta aðalfundi, Heiðveigu Maríu Einarsdóttur, var vísað úr félaginu. Ekki sér þó fyrir enda á þeim málarekstri öllum. Kolbrún Garðarsdóttir, lögmaður Heiðveigar, hefur stefnt SÍ til félagsdóms og farið fram á flýtimeðferð vegna þess að framboðsfrestur til stjórnarkjörs rennur út á hádegi á mánudag komandi.

Hálfdán Henrýsson. Sjómannadagsráð

Ekkert uppá Jónas að klaga

Hálfdán Henrýsson er formaður Sjómannadagsráðs. Hann segir, í samtali við Vísi að hann hafi sem formaður stigið fram þegar tillaga Guðmundar Helga var borin upp og svarað þannig að það væri ekki heimild til þess í lögum Sjómannadagskráðs að skipta sér af innanbúðarmálum hvers félags um sig. Við svo búið var málinu vísað frá.

„Okkur er ekki heimilt að skipta okkur af innafélagsmálum. Okkar hlutverk er það eitt að halda upp á Sjómannadaginn og reka heimili fyrir aldraða.“

Hálfdán segir þetta hafa farið friðsamlega fram og ekki hafi orðið neinar frekari umræður um málið. Þá segir hann spurður að Jónas njóti fulls trausts stjórnar Sjómannadagsráðs.

„Hann er duglegur maður og gott að vinna með honum. Við höfum ekkert uppá hann að klaga. Jónas er úrræðagóður og tekur þátt í öllum umræðum.“

En, hann er umdeildur maður?

„Já, það er allt annað mál. En hérna sinnir hann sínum störfum mjög vel og meðan ekkert annað kemur upp höfum við ekkert annað um það að segja. Það eru fimmtíu og eitthvað ár síðan ég var í Sjómannafélagi Íslands. Ég er í Skipsstjórnarfélaginu og við leiðum allt svona hjá okkur,“ segir Hálfdán.

Heiðveig María hefur sagt tíma til kominn að hreinsa til í Sjómannafélagi Íslands. FRÉTTABLAÐIÐ/ERNIR

Eignir SÍ renni til Sjómannadagsráðs

Nýverið var kynnt á heimasíðu SÍ breyting á lögum félagsins og vísað til samþykktar á síðasta aðalfundi fyrir tæpu ári. Þetta er síðasta grein laga, númer 28 þar sem segir að ef til slita félagsins komi, eins og gert hafði verið ráð fyrir að yrði þegar og ef til sameiningar sjómannafélaga kæmi, viðræður sem svo sigldu í strand, myndu allar eigu félagsins renna til Dvalarheimilis aldraðra sjómanna DAS, sem er í eigu Sjómannadagsráðs, hvar Jónas er gjaldkeri.

„28. gr. Félaginu verður ekki slitið nema 3/4 allra félagsmanna samþykki það að viðhafðri allsherjar atkvæðagreiðslu. Auðir og ógildir seðlar teljast ekki greidd atkvæði. Verði samþykkt að leggja félagið niður, skal eignum félagsins ráðstafað til Dvalarheimilis aldraðra sjómanna DAS. Um sameiningu félaga skal fjallað á sama hátt og lagabreytingar.“

Heiðveig María ætlaði að henda sér í formannsstólinn í Sjómannafélagi Íslands. Það hefur reynst þrautarganga.

Vísir reyndi að ná tali af Bergi Þorkelssyni, gjaldkera SÍ í dag vegna þessa, en Bergur er jafnframt varmaður í stjórn Sjómannadagsráði. Bergur hefur áður upplýst í samtali við Vísi að komandi stjórnarkjör væri hugsað til málamynda, Jónas muni ekki gefa kost á sér en hann situr út næsta ár sem formaður.

En, þá var líka gert ráð fyrir því að félagið yrði lagt niður í kjölfar sameiningar sjómannafélaga. Bergur hafði ekki tök á að ræða við blaðamann Vísis þegar í hann náðist nú í dag. Og benti blaðamanni á að reyna síðar. Til stóð að inna Berg eftir því hvenær þetta lagaákvæði hefði verið sett inná heimasíðuna og um hversu miklar eignir væri að ræða?

Lagabreytingin kemur formanni Jötuns í opna skjöldu 

Jötunn í Eyjum og Sjómannafélag Eyjafjarðar höfðu frumkvæði að því að slíta sameiningaviðræðum við SÍ og fleiri félög. Það var meðal annars vegna ásakana Heiðveigar Maríu á hendur stjórn SÍ en að sögn Þorsteins Guðmundssonar formanns Jötuns voru þar fleiri álitaefni sem menn hnutu um, og þá ekki síður í atriðum sem komu upp seinna svo sem brottrekstri Heiðveigar sem Jötunn hefur fordæmt.

Sjómenn í Eyjum og í Eyjafirði höfðu frumkvæði að því að slíta samningaviðræðunum.

Þorsteinn segir þessa lagabreytingu, um að eignir félagsins ættu að renna til Sjómannadagsráðs, koma sér virkilega á óvart. Hann segir að samningaviðræðurnar hafi verið komnar á það stig að menn hafi gróflega verið búnir að leggja niður fyrir sig eignastöðu. Næsta skref hafi svo átt að vera að fara nánar yfir sjóðastöðu með fulltingi lögmanna. 

Til þess kom þó ekki vegna slita á viðræðum. Þorsteinn segist hafa talið að eignir ættu að renna í sameiginlegt félag en um er að ræða einhverjar íbúðir og sumarbústaði svo eitthvað sé nefnt.


Tengdar fréttir

Jónas gefur lítið fyrir gagnrýni á stjórn

Jónas Garðarsson gefur lítið fyrir gagnrýni ýmissa verkalýðsforingja og ályktun aðalfundar Sjómannafélagsins Jötuns í Vestmannaeyjum um brottvikningu Heiðveigar Maríu Einarsdóttur.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.