Heildarávinningur rafbílavæðingar bílaflotans er mikill

Talið er að raforkuþörf aukist um allt að helming með rafbílavæðingu bílaflotans hér á landi. Því fyrr sem það gerist því meiri verður þjóðhagslegur og fjárhagslegur ávinningur landsmanna samkvæmt nýrri rannsókn.

Ríkisstjórnin kynnti aðgerðir í loftslagsmálum í september en þær miða að því að standa við skuldbindingar gagnvart Parísarsamkomulaginu og gera Ísland kolefnishlutlaust fyrir 2040. Meðal þeirra er að banna nýskráningar á bensín- og dísilbílum eftir árið 2030. Háskólinn Íslands og Háskólinn í Reykjavík hafa gert greiningu á hver þjóðhagsleg hagkvæmni rafbílavæðingar er og voru niðurstöður kynntar á fundi í Norræna húsinu í dag. Hlynur Stefánsson dósent í tækni-og verkfræðideild Háskólans í Reykjavík var meðal þeirra sem gerði greininguna.

„Það er umtalsverður heildarávinningur af rafbílavæðingu hér á landi. Þjóðhagslegur ávinningur er réttu megin við núllið en heildarávinningurinn er mjög skýr. Því meiri og hraðari sem rafbílavæðingin verður því jákvæðari eru áhrifin,“ segir Hlynur.

Hann segir hins vegar að aðgerðin sé ekki nægjanleg til að ná markmiðum stjórnvalda.

„Við þurfum líka að skoða vetni og metan og kerfislegar breytingar eins og að breyta ferðavenjum fólks þannig að almenningssamgöngur verði notaðar meira,“ segir hann. 

Orkufyrirtækin í landinu hafa ákveðið að meta hver raforkuþörfin verði þegar rafbílar verða meirihluti bílaflotans. Páll Erland framkvæmdastjóri Samorku segir að tilgátur séu þegar komnr fram en rannsóknin tekur ár.

„Það er ekkert ólíklegt að raförkuþörfin muni aukast um helming þegar bílaflotinn er orðin rafbílavæddur,“ segir Páll. 

Hann segir jafnframt að 85% af allri orkunotkun innanlands sé með endurnýjanlegum orkugjöfum og Íslendingar standi fremst í heiminum ásamt norðmönnum þegar kemur að því. Mikilvægt sé að draga úr þeim 15% orkugjafa sem valdi mengun.