Fara fram á farbann yfir skútuþjófnum

Lögreglan á Vestfjörðum mun fara fram á farbann yfir manninum sem rændi skútunni Inook úr Ísafjarðarhöfn aðfararnótt sunnudags.

Lögregla leitaði hjálpar Landhelgisgæslunnar og fann þyrla gæslunnar skútuna og vísaði henni til hafnar í Rifi á Snæfellsnesi. Þar var maðurinn handtekinn af lögreglunni á Vesturlandi. 

Fram kemur í tilkynningu að sakborningurinn verði innan tíðar færður fyrir Héraðsdóm Vestfjarða en þar mun lögreglustjórinn fara fram á farbann yfir manninum.