Mikil umferðarteppa í Hafnarfirði vegna malbikunarframkvæmda
Mikil umferðarteppa er nú í Hafnarfirði við álverið í Straumsvík en þar standa nú yfir malbikunarframkvæmdir. Áætlað er að framkvæmdirnar standi til klukkan tíu í kvöld.
Unnið er á malbikun á báðum akreinum á Reykjanesbraut við álverið og er annarri akreininni lokað í einu og umferð stýrt í gegnum vinnusvæðið. Framkvæmdir hófust í morgun og hefur umferð gengið hægt á svæðinu í allan dag.
Á myndum má sjá að bílaröðin út úr Hafnarfirði er mjög löng en Vegagerðin biður vegfarendur um að virða merkingar og hraðatakmarkanir og sýna aðgát við vinnusvæðin. Vinnusvæðin eru þröng og menn og tæki við vinnu mjög nálægt akstursbrautum.
Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
