Handbolti

Stefán Rafn: Búinn að spila vel og hef margt fram að færa

Ingvi Þór Sæmundsson skrifar
Stefán á einu af stórmótum sínum með Íslandi.
Stefán á einu af stórmótum sínum með Íslandi. vísir/eva björk
Undirbúningur íslenska karlalandsliðsins í handbolta fyrir leikina gegn Litháen í umspili um sæti á HM 2019 er hafinn.

Fáir leikmenn mæta með jafn mikið sjálfstraust til leiks og Stefán Rafn Sigurmannsson. Hornamaðurinn knái leikur með Pick Szeged sem varð ungverskur meistari á dögunum. Szeged batt þá enda á 10 ára sigurgöngu Veszprém.

„Þeir hafa verið númer eitt og enginn annar hefur komist að. Þannig að þetta er frábært fyrir félagið mitt og ungversku deildina,“ sagði Stefán Rafn í samtali við Fréttablaðið fyrir landsliðsæfingu í Safamýrinni í gær.

„Árið 2012 keypti nýr eigandi félagið og þá byrjaði þetta allt. Þá kom þjálfarinn [Juan Carlos Pastor] og byrjaði að leggja grunninn að þessu. Þetta hefur tekið tíma en félagið uppskar loksins núna og þetta er hrikalega sætt. Það er mikil gleði í bænum og ég held að það hafi verið partí í viku.“

Stefán Rafn kveðst afar ánægður í herbúðum Szeged. „Ég gerði tveggja ára samning og verð áfram. Mér líður ótrúlega vel þarna. Þetta er frábært félag og vel hugsað um mann.“

Stefán Rafn er himinlifandi með endurkomu Guðmundar Guðmundssonar í stól landsliðsþjálfara.

„Hann er ótrúlega fær þjálfari og einn af þeim bestu í heiminum. Hann nær því besta fram hjá mönnum og þá verður liðið sjálfkrafa betra. Það er frábært að vera búnir að fá hann til baka,“ sagði Stefán Rafn.

„Við erum með mikið af ungum strákum og maður er orðinn einn af þeim eldri í hópnum, 28 ára. Þessir strákar eru ótrúlega góðir og það er gott fyrir þá að fá svona góðan þjálfara sem heldur vel utan um þetta.“

Stefán Rafn var ekki með á síðustu tveimur stórmótum. Þrátt fyrir það gerir hann sér vonir um að vera í lokahópnum í leikjunum gegn Litháen sem verður kynntur á næstu dögum.

„Já, algjörlega. Ég er búinn að spila mjög vel og hef margt fram að færa. Ég geri mér miklar vonir um það,“ sagði Stefán Rafn. –




Fleiri fréttir

Sjá meira


×