Erlent

„Ég myndi aldrei sitja þarna og leyfa krökkunum mínum að vera slátrað“

Samúel Karl Ólason skrifar
Nikolas Cruz myrti sautján manns þann 14. febrúar.
Nikolas Cruz myrti sautján manns þann 14. febrúar. Vísir/EPA
Lögreglufulltrúinn fyrrverandi, Scot Peterson, hefur tjáð sig í fyrsta sinn um skotárásina í Marjory Stoneman Douglas-menntaskólanum í Parkland í Flórída þar sem Nikolas Cruz myrti sautján manns þann 14. febrúar. Peterson var gert að setjast í helgan stein eftir árásina en hann var eini vörður skólans og upptökur úr myndavélum sýndu hann bíða fyrir utan húsið á meðan Cruz var þar inni að myrða fólk.

Í viðtölum við fjölmiðla í Bandaríkjunum hefur Peterson beðist afsökunar en hann segist ekki hafa verið hræddur. Það hafi ekki verið ástæðan fyrir því að hann fór ekki inn í bygginguna þar sem Cruz myrti fólkið.

Peterson segir að ástæðan hafi verið sú að hann vissi ekki hvar Cruz væri og taldi hann að leyniskytta væri að skjóta.

„Þetta voru krakkarnir mínir. Ég myndi aldrei sitja þarna og leyfa krökkunum mínum að vera slátrað. Aldrei,“ sagði Peterson í samtali við NBC.



Eftir að lögreglan birti upptökur úr öryggismyndavélum, þar sem Peterson sást fara í skjól fyrir utan bygginguna, var hann titlaður „heigullinn frá Browar“, eða „Coward from Broward“, þar sem skólinn er í Broward-sýslu. Donald Trump, forseti Bandaríkjanna, gagnrýndi Peterson opinberlega og sagði hann vera heigul. Trump sagði að ef hann hefði sjálfur verið á vettvangi hefði hann farið inn í bygginguna, jafnvel þó hann væri óvopnaður.

Nú hefur Peterson stigið fram og segir hann það vera til að gefa raunhæfa mynd af ástandinu þennan morgun. Ekki þá mynd sem fógetinn Scott Israel hafi gefið.

Hélt að um leyniskyttu væri að ræða

Hann segist hafa rokið af stað um leið og tilkynning um skothljóð barst og á leiðinni á vettvang hafi hann heyrt fleiri skot sem hann taldi koma frá leyniskyttu. Því leitaði hann sér skjóls og kallaði í talstöð sína að lögregluþjónar ættu að halda sig frá staðnum.

Peterson segist ekki hafa talið að árásarmaðurinn væri inni að myrða nemendur og starfsmenn, þrátt fyrir að árásir sem slíkar séu orðnar einkar algengar í Bandaríkjunum og að hann hafði verið þjálfaður í að bregðast við slíkum árásum. Sömuleiðis sýna upptökur að Peterson sagði í talstöð sína að hann heyrði skothríð „við, inn í húsinu“.

Þegar hann kom á vettvang hafði Cruz þegar myrt ellefu manns á jarðhæð hússins og fór hann upp á þriðju hæð þar sem hann myrti sex til viðbótar.

Peterson segist aldrei hafa heyrt fleiri skot.

„Það hrellir mig að ég vissi ekki hvað var að gerast,“ segir Peterson. „Ég var að reyna að gera það besta sem ég gat með þær upplýsingar sem ég hafði og þetta gerðist allt svo hratt.“

Peterson sagði einnig að hann óskaði þess að geta talað við fjölskyldur þeirra sem dóu og útskýrt mál sitt.

Hann var sömuleiðis í viðtali hjá Washington Post þar sem hann kemst að þeirri niðurstöðu að hann hefði lítið getað gert til að bjarga lífum.



Foreldrar ekki sáttir

Foreldrar nemenda sem voru myrtir hafa þó ekki tekið vel í afsökunarbeiðni Peterson. Blaðamenn Miami Herald ræddu við nokkra foreldra.

„Ég er þreyttur á því að hann sé að mála sig sem fórnarlamb,“ sagði Fred Guttenberg, faðir hinnar fjórtán ára gömlu Jaime Guttenberg. „Hann er ekki fórnarlamb. Hann bjó til fórnarlömb. Hann talar um þau sem sýna krakka. Þau voru ekki þínir krakkar, Scot Peterson. Þú leyfðir þeim að deyja!“

Guttenberg sagði einnig að ef Peterson hefði unnið starfið sitt hefðu þeir sem voru myrtir á þriðju hæðinni aldrei dáið.

„Þetta fólk sem dó, þar á meðal dóttir mín, eru fórnarlömb vanhæfni hans til að vinna vinnuna sína.“ Guttenberg skoraði á Peterson að hitta sig í persónu.

Annar maður sem rætt var við sagðist vera alveg sama þó Peterson segist eiga bágt.

„Ég skil ekki hvernig hann getur haldið því fram að hann hafi unnið vinnuna sína. Hann gerði ekki neitt. Hann stóð fyrir utan. Hann vissi að gaurinn var inni að drepa börnin okkar. Þetta er kjaftæði,“ sagði Max Schachter. „Hann olli í rauninni fleiri dauðsföllum með því að segja lögregluþjónum að fara ekki þarna inn. Það ætti að ákæra hann.“

Einn af nemendum skólans, Morgan Williams, greip til Twitter í gær þar sem hún sagðist ekki ætla að lesa viðtöl við Peterson. Sama hvað hann segði þá væri hann heigull.


Tengdar fréttir

Árásin í Parkland breytti litlu

Skólaskotárásin í Parkland í Flórída, þar sem sautján nemendur voru myrtir, hafði engin varanleg áhrif á afstöðu Bandaríkjamanna gagnvart skotvopnaeign.




Fleiri fréttir

Sjá meira


×