Tilnefning Braga stendur

Velferðarráðuneytið sætir harðri gagnrýni fyrir rannsókn sína á meintum afskiptum Braga Guðbrandssonar, forstjóra Barnaverndarstofu, af einstökum málum hjá barnaverndarnefndum. Þetta kemur fram í úttekt sem kynnt var í morgun. Bragi segir niðurstöðuna mikinn létti, en framboði hans til barnaréttarnefndar Sameinuðu þjóðanna verður haldið til streitu.

Sérstaklega fjallað um Hafnarfjarðarmálið

Rannsókn velferðarráðuneytisins sneri að meintum óeðlilegum afskiptum forstjórans að barnaverndarmálum á höfuðborgarsvæðinu. Sérstaklega var fjallað um svonefnt Hafnarfjarðarmál í úttektinni, þar sem velferðarráðuneytið komst að þeirri niðurstöðu í febrúar að Bragi hefði farið út fyrir starfssvið sitt í máli þar sem faðir var grunaður um kynferðisofbeldi gegn börnum sínum. Ávirðingarnar sneru að samskiptum Braga við föðurafa barnanna, sem vildi hlutaðist til um umgengni þeirra við veika ömmu sína.

„Þar hafi ráðuneytið ekki haft fullnægjandi gögn til að álykta sem svo að hann hafi farið út fyrir verksvið sitt. Við gerðum líka athugasemdir við það að hann hefði ekki fengið að tjá sig um þau gögn sem ráðuneytið þó byggði á. Auk þess töldum við ekki forsendur til að álykta sem svo að hann hefði hugsanlega gerst brotlegur við þagnarskylduákvæði eins og gefið var í skyn í bréfi ráðuneytisins til hans,“ segir Kjartan Bjarni.

Raunveruleiki í óraunveruleikanum

Bragi hefur verið í leyfi frá störfum sínum hjá Barnaverndarstofu í nokkra mánuði, en hann segir niðurstöðuna mikinn létti.

„Ég hef helgað síðustu 30 ár eða meira af mínu lífi í að berjast fyrir réttindum barna, ekki síst barna sem þolað hafa kynferðisofbeldi og setið svo undir ámæli um það að ég hafi stefnt öryggi barna í hættu með því að beita mér fyrir því að þau yrðu afhent meintum barnaníðingi. Það er vissulega raunveruleiki í óraunveruleikanum,“ segir Bragi.

Í samtali við fréttastofu vildi Bragi ekki tjá sig sérstaklega um málsmeðferð ráðuneytisins.

„Ég vil horfa fram á við. Ríkisstjórnin hefur núna í morgun staðfest að við höldum ótrauð áfram með framboð mitt til barnaréttarnefndar SÞ og ég hlakka bara til að halda áfram að vinna að því verkefni.

Boltinn hjá ráðherra

Kjartan Bjarni telur ekki sitt að segja um næstu skref yfirvalda gagnvart Braga.

„Við litum á það sem svo að það væri ekki hlutverk okkar að fara að segja velferðarráðherra fyrir verkum, hvað hann ætti að gera. Okkar úttekt miðaðist við það sem var búið og gert. Boltinn er núna hjá velferðarráðherra varðandi næstu skref.“