Segir fyrsta þyrluútkallið byggt á misskilningi

Þyrla Landhelgisgæslunnar var afturkölluð fimmtán mínútum eftir að fyrsta útkall barst vegna erlendrar ferðakonu sem fékk höfuðhögg í Reynisfjöru í gær. Konan lést á Landspítalanum í dag. Aðstoðarforstjóri Neyðarlínunnar segir misskilning hafa ráðið því að þyrlan var kölluð út til að byrja með en konan reyndist síðar meira slösuð en fyrst var talið.

Frétt Vísis: Konan sem slasaðist í Reynisfjöru er látin

Samkvæmt upplýsingum frá Landhelgisgæslunni var þyrla á þeirra vegum kölluð út klukkan 14:36 í gærkvöldi eftir beiðni frá Neyðarlínu. Fjórtán mínútum síðar hafi hins vegar borist upplýsingar um að aðstoð hennar væri afþökkuð. Rúmum hálftíma seinna var hins vegar aftur óskað eftir aðstoð þyrlu sem lagði af stað fjórtán mínútum síðar og tók við konunni úr sjúkrabíl sem þegar var lagður af stað áleiðis.

Segir engan hafa afturkallað þyrluna

Yfirmaður sjúkraflutninga á Suðurlandi segir hins vegar að viðbragðsaðilar á vettvangi hafi ekki afturkallað þyrluna, heldur aðeins óskað eftir lækkuðu viðbragðsstigi björgunarsveita.

„Það virðist sem skilaboðin hafi verið túlkuð þannig að hún hafi verið afturkölluð í leiðinni. Við erum búin að fara ítarlega yfir það með okkar fólki frá Heilbrigðisstofnun Suðurlands og okkar fólki á vettvangi og það var aldrei beðið um afturköllun á þyrlu. Þannig að við erum í rauninni bara að skoða þetta mál,“ segir Styrmir.



Málið byggt á misskilningi

Tómas Gíslason, aðstoðarframkvæmdastjóri Neyðarlínunnar segir fyrsta útkallið byggt á misskilningi, þar sem tvö Neyðarlínusímtöl bárust nánast samtímis.

„Annað er kona, öldruð kona, sem hefur hrasað og fengið sár á höfuð og blæðir úr því, en er með fína meðvitund að því er okkur skilst. Í það er boðaður sjúkraflutningur í forgangi 2,“ segir Tómas.

Það seinna sneri hins vegar að karli sem innhringjandi, erlendur maður, sagði hafa hrapað og virtist meðvitundarlaus á svæðinu.

„Það er bara allt ræst út, björgunarsveitir og þyrla út af þessum meðvitundarlausa karlmanni. Á sama tíma er á leiðinni sjúkraflutningur að flytja konuna sem er þarna með skurð á höfði,“ segir Tómas.



Málið sem þyrlan átti að sinna ekki til

Hann segir að í ljóst hafi komið enginn maður hafði í raun hrapað, heldur hafi Neyðarlínusímtalið einfaldlega verið óskýrt vegna tungumálaörðugleika hjá innhringjanda. Þá hafi ástand konunnar í fyrstu ekki virst sérstaklega alvarlegt.

„Síðan reyndar þróast mál þannig að meðvitundarstig hennar versnar eftir að sjúkraaðilar eru komnir á staðinn sem verður til þess að þyrlan er síðan send,“ segir Tómas.

Hann segir því að upphafleg afturköllun þyrlunnar hafi verið eðlileg, þó sorglegt sé hvernig málið hafi farið að lokum.

„Það að þyrlan fari ekki af stað er bara vegna þess að málið sem átti að kalla hana í reyndist ekki til.“