Neymar hræddur við að snúa aftur

Brasilíska stórstjarnan Neymar segist ekki viss um að hann verði tilbúinn andlega til að snúa aftur á fótboltavöllinn á HM í Rússlandi því hann sé hræddur eftir meiðslin.

Neymar fótbrotnaði í leik með Paris Saint-Germain í febrúar og hefur ekki spilað leik síðan. Hann hefur áður sagt að hann búist við því að vera tilbúinn fyrir fyrsta leik á HM þann 17. júní gegn Sviss. Nú hefur hann hins vegar sagt að hann sé ekki alveg viss með stöðuna á sér andlega.

„Allt gengur vel, Guði sé lof, en það er alltaf einhver hræðsla þegar maður snýr aftur. Ég þarf að losna við þessa hræðslu eins fljótt og hægt er til þess að geta mætt á HM,“ sagði Neymar við Youtube rás brasilísku goðsagnarinnar Zico.

Búist er við að Neymar byrji að æfa aftur fljótlega með PSG.