Fjárfestum í framtíðinni!

Gerum byltingu í skólamálum borgarinnar



Náttúruauðlindir eru ekki trygging fyrir góðum lífskjörum almennings. Það er hins vegar menntun. Finnar ákváðu að setja menntun barnanna sinna í forgang með frábærum árangri og það viljum við Framsóknarmenn í Reykjavík líka gera. Það er staðreynd að þessi mál hafa ekki verið í forgangi hjá núverandi meirihluta og við verðum að forgangsraða á komandi kjörtímabili í þágu leik- og grunnskóla í borginni.

Setjum leikskólann í forgang

Leikskólamál hafa því miður setið á hakanum hjá núverandi meirihluta líkt og grunnskólinn. Á meðan hægt er að finna peninga í ýmis gæluverkefni út um allan bæ hefur verið plástrað á vandamál leikskólanna með skyndilausnum. Við þurfum að taka ákvörðun um að setja leikskóla og umönnun barnanna okkar í fyrsta sæti. Kjör leikskólakennara og starfsálag er langt frá því að vera ástættanlegt. Það vita allir að við þurfum að hækka laun leikskólakennara í samræmi við þá miklu ábyrgð sem fylgir starfinu og fyrir því ætlum við að beita okkur. Við viljum einnig skoða að breyta náminu þannig að starfsnám á síðasta ári verði launað og gera aðgengi ófaglærðra starfsmanna að náminu auðveldara. Þá ætlum við að bæta aðbúnað og starfsumhverfi í leikskólum en þar er mikil uppsöfnuð þörf.

Eflum grunnskólann – gefum snjallsímanum frí

Við þurfum líka að efla okkar góðu grunnskólakennara og gera kennarastarfið eftirsótt á ný. En hvernig gerum við það? Við viljum afnema bindingu vinnutíma kennara í grunnskólum og efla sjálfstæði þeirra í kennsku, ásamt því að hækka laun þeirra þannig að þau endurspegli bæði þá menntun og ábyrgð sem fylgir starfinu. Snjallsímar eru áberandi í daglegu lífi okkar allra og geta truflað kennslu sé notkun þeirra ekki takmörkuð. Rannsóknir hafa sýnt bættan námsárangur þegar notkun snjallsíma er takmörkuð í kennslu og er mikil ánægja með slíkar aðgerðir í Noregi. Gefum snjallsímanum frí á skólatíma.

Fjárfestum í framtíðinni

Við erum öll sammála um það að kennarastarfið er gríðarlega mikilvægt. Samt hafa kjör og aðbúnaður kennara mætt afgangi allt of lengi. Sækjum ekki vatnið yfir lækinn heldur lærum af þeim þjóðum sem eru í farabroddi þegar kemur að menntun barnanna okkar. Allt mun þetta kosta, en mun kosta okkur miklu meira sem samfélag ef við bregðumst ekki fljótt við. Það er bara ákvörðun að setja menntun í fyrsta sæti og er einfaldlega spurning um að fjárfesta í framtíðinni.

Höfundur er oddviti Framsóknarflokksins í borgarstjórnarkosningum 26. maí 2018.