Enginn Aguero gegn Liverpool í kvöld

Risaleikur Liverpool og Man. City í Meistaradeildinni í kvöld verður án Sergio Aguero, framherja Man. City, en hann er meiddur.

Aguero hefur misst af síðustu fimm leikjum vegna meiðslanna en vonast var til að hann myndi ná sér fyrir leik kvöldsins. Af því verður ekki.

„Hann er á góðum batavegi en líður samt ekki nægilega vel. Við tökum því engar áhættur,“ sagði Pep Guardiola, stjóri City.

Þetta er fyrri leikur liðanna í átta liða úrslitum keppninnar. City er búið að pakka ensku deildinni saman og hefur aðeins tapað gegn Liverpool í vetur.

„Þetta er risaleikur gegn einu besta liði Evrópu, ef ekki besta liði Evrópu í augnablikinu,“ sagði Jürgen Klopp, stjóri Liverpool.

„Það er samt engin tilviljun að við séum komnir svona langt. Vissulega unnum við Man. City fyrir nokkrum mánuðum síðan og við vitum því vel að það er hægt. Þetta er samt risaverkefni gegn sérstöku liði.“