Löwen staðfestir endurkomu Kim Ekdahl du Rietz

Þýska stórliðið Rhein-Neckar Löwen hefur staðfest endurkomu Svíans Kim Ekdahl du Rietz en hann lagði skóna á hilluna síðasta sumar, aðeins 27 ára gamall, þar sem hann sagðist vera kominn með leið á handbolta og langaði til að ferðast um heiminn.

Honum hefur snúist hugur og mun hann nú hjálpa Löwen á lokasprettinum í þýsku úrvalsdeildinni þar sem liðið er í hörkubaráttu um efsta sætið auk þess að vera enn með í Meistaradeild Evrópu.

Hann er þegar orðinn löglegur með Ljónunum þar sem samningur hans við félagið er enn í gildi og hann var á leikmannalista félagsins fyrir tímabilið þrátt fyrir að hafa yfirgefið Þýskaland til að ferðast.

Aldeilis frábærar fréttir fyrir Guðjón Val Sigurðsson, Alexander Petterson og félaga í Löwen en liðið var í leit að liðsstyrk eftir að Spánverjinn Gedeon Guardiola meiddist á dögunum.