Einn besti handboltamaður heims hættir 27 ára til að ferðast um heiminn

Þó svo að Kim Ekdahl du Rietz sé einungis 27 ára hefur hann þegar ákveðið að hætta að spila handbolta í vor.

Ekdahl du Rietz er samningsbundinn þýsku meisturunum í Rhein-Neckar Löwen til loka tímabilsins 2018. Hann hefur hins vegar komist að samkomulagi um starfslok í lok tímabils.

„Kim greindi okkur frá framtíðaráætlunum sínum,“ segir í frétt á heimasíðu Löwen í dag.

„Við berum virðingu fyrir hans óskum, að hann vilji hefja nýtt líf í sumar án aðkomu afreksíþrótta. Við hefðum gjarnan viljað halda Kim til 2018 og hörmum ákvörðun hans mjög,“ segir enn fremur í fréttinni.

Til að fylla í skarð hans hefur Löwen ákveðið að semja við serbneska landsliðsmanniunn Momir Rnic sem mun koma í sumar frá Melsungen.

Ekdahl Du Rietz hefur glímt við meiðsli í gegnum tíðina en virðist þó ekki hætta vegna meiðsla, enda ekki misst af leik í Þýskalandi í þrjú og hálft ár eftir því sem fram kemur í Aftonbladet.

Kemur fram í sömu frétt að hann hafi ávallt farið sína leið í lífinu og hafi í hyggju að ferðast um heiminn.