Íslenski nuddarinn í NBA aftur með í hamborgaraáti og fótanuddi á ESPN

Íslendingurinn Einar Einarsson og Joel Embiid voru aftur mættir á ESPN í nótt þegar bandaríska sjónvarpsstöðin sýndi frá undirbúningi miðherja Philadelphia 76ers fyrir leik í NBA-deildinni.

Það vakti talsverða athygli í síðustu viku þegar ESPN tók upp myndband af Joel Embiid að borða hamborgara rétt fyrir leik og seinna kom í ljós að Íslendingurinn Einar Einarsson var að nudda hann á sama tíma.

Joel Embiid hafði ekki miklar áhyggjur af þessu myndbandi því hann var mættur aftur fyrir leikinn í nótt þar sem Einar og Embiid buðu ESPN og áhorfendum sjónvarpsstöðvarinnar upp á hamborgaraát og fótanudd.

ESPN setti þetta inn á fésbókarsíðu sína eins og sjá má hér fyrir neðan.

Þetta uppátæki þeirra félaga boðar þó ekki gott fyrir Philadelphia 76ers því eins og um daginn þá þurfti liðið að sætta sig við tap í nótt.

Leikmenn Philadelphia 76ers réðu ekkert við gríska fríkið, Giannis Antetokounmpo, sem var með 35 stig, 9 fráköst og 7 stoðsendingar fyrir Milwaukee Bucks í leiknum. Joel Embiid sjálfur var með 19 stig, 8 frákö0st og 7 tapaða bolta.

Joel Embiid kynntist góðri meðhöndlun Einars Einarssonar þegar hann fór á sínum tíma í meðferð til Katar á Aspetar íþróttameiðslasjúkrahúsinu í Dóha. Einar Einarsson hefur síðan fylgt Joel Embiid eftir á þessu tímabili og oft sést meðhöndla hann í kringum leiki Philadelphia 76ers.

Margir þekktir íþróttamenn leita til Aspetar til að fá góða meðhöndlun og þangað hafa farið íslenskir knattspyrnumenn eins og Eiður Smári Guðjohnsen og Alfreð Finnbogason sem dæmi.

Einar Einarsson er gamall knattspyrnumaður sjálfur en hann lék með Víkingi, KA og Leiftri í efstu deild á Íslandi og á að baki 72 leiki í A-deildinni. Hann spilaði stærsta hluta ferils síns með Víkingi þar sem hann hóf sinn knattspyrnuferil.