Ari Eldjárn sýnir á sér rokkhliðina

„Þetta var fyrsta hljómsveitin sem ég byrjaði að hlusta á. Fyrsta platan sem ég eignaðist var einmitt með Kiss. Síðan kviknaði þessi hugmynd hvort ég vildi vera gestur hjá þeim og ég ætla að fá að koma,“ segir grínistinn Ari Eldjárn en hann mun spila með ábreiðubandinu MEIK á föstudag.

MEIK heldur þá tónleika á Hard Rock en hljómsveitarmeðlimir eiga það sameiginlegt að vera forfallnir aðdáendur KISS. „Þessir meistarar hafa haldið úti þessu8 stórkostlega ábreiðubandi í einhver ár og meira að segja fengið fyrrverandi gítarleikara Kiss, Bruce Kulick, til að spila með sér. Ég hef aldrei komist á tónleika en alltaf viljað fara og hlakka mikið til.“

Ari segist vera aðdáandi KISS sem hefur verið að gefa út plötur síðan 1974 þegar samnefnd plata kom út. „Ég er samt ekki jafn ofstopafullur og þessir menn. Þráinn Árni Baldvinsson á held ég stærsta Kiss-safn Íslands og þekkir framleiðslunúmer á plötum með Kiss.“

Meðlimir MEIK mála sig í fánalitum Kiss ef svo má segja en Ari getur ekki alveg farið þá leið. Hann er nefnilega að skemmta síðar um kvöldið. Atriðið verður óvænt og hefur Ari ekki ákveðið hvaða lag hann mun taka en úr nægu er að velja. „Ég lærði að meta Kiss af eldri bræðrum mínum. Það var mikið rætt um Kiss á heimilinu og það var mikill húmor fyrir sveitinni. Þetta er auðvitað stórskemmtileg hljómsveit á alla kanta.“