Slökkvistarf gengur vel: „Það er alltaf gott að sjá ljósan reyk“

„Það er alltaf gott að sjá ljósan reyk,“ segir Haukur Grönli varaslökkviliðsstjóri Brunavarna Árnessýslu í samtali við fréttastofu fyrir utan stöðvarhús Hellisheiðarvirkjunar þar sem kviknaði eldur skömmu fyrir hádegi í dag.

Slökkviliðið hefur náð tökum á eldinum í stöðvarhúsi Hellisheiðarvirkjunar. Allt tiltækt lið slökkvilið frá höfuðborgarsvæðinu og úr Árnessýslu var kallað út vegna eldsvoðans en úttlit er fyrir að töluvert tjón hafi orðið í eldinum. Þykkan svartan reyk lagði frá stöðvarhúsinu þegar slökkvilið bar að garði.

„Aðkoman var nokkuð mikilfengleg ef við getum orðað það þannig. Það stóðu eldtungur upp úr þakinu og mikill reykur,“ segir Haukur Grönli, varaslökkviliðsstjóri Brunavarna Árnessýslu í samtali við fréttastofu á vettvangi.

Er eldurinn talinn hafa komið upp í loftræstikerfi virkjunarinnar en samkvæmt upplýsingum frá Orkuveitu Reykjavíkur sakaði engan og gekk vel að rýma húsið. Haukur segir að umfang slökkvistarfsins hafi verið mikið.

„Það er verið að framleiða raforku hérna og þetta er mikilvægur vinnustaður. Aðkoman að þessu, það eru hættur hérna. Það var mikið umfang að ná utan um þetta, segir Haukur en segir hann að í stöðvarhúsinu sé mikið af lokuðu rými þar sem hætta sé á að hiti, þrýstingur og reykur af völdum eldsins geti valdið sprengingum.

Slökkvistarf heldur áfram fram eftir degi

Þá var einnig gengið úr skugga um að slökkviliðsmönnum myndi ekki stafa hætta af rafmagni eða rafmagnsframleiðslu áður en slökkvistarf hófst en ákveðið var að slökkva á varmastöð virkjunarinnar sem framleiðir heitt vatn fyrir hitaveituna á höfuðborgarsvæðinu.

Segir Haukur að ekki sé ljóst hvort búið sé að slökkva eldinn en hann telur þó að slökkvilið hafi náð stjórn á eldinum. Hann segir ljóst að slökkvistarf muni halda áfram um töluverðan tíma. Næsta verk eftir að búið verði að slökkva eldinn sé að fara um húsið og ganga úr skugga um að eldur geti ekki komið upp aftur.

Í tilkynningu frá Orkuveitunni segir að verði ekki frekari röskun á vinnslu virkjunarinnar eigi viðskiptavinir Orku náttúrunnar ekki að verða þessa varir. Þá sé ekki vitað um tjón vegna eldsins. Segir Haukur að hann geri ráð fyrir að mikið tjón hafi orðið í eldinum.

„Ég get voða lítið tjáð mig um það fyrr en ég sé hvað er en væntanlega verður þetta mikið tjón, það er öruggt mál.“