Rannsaka doktorsgráðu Grace Mugabe

Stofnun sem rannsakar spillingu í Simbabve kannar nú hvort að fyrrverandi forsetafrúin Grace Mugabe hafi öðlast doktorsgráðu sína með sviksamlegum hætti.

Kennarar við Háskóla Simbabve skiluðu í síðustu viku undirskriftarsöfnun þar sem farið var fram á að málið yrði rannsakað. BBC greinir frá.

Grace Mugabe hlaut doktorsgráðu sína frá skólanum árið 2014, einungis nokkrum mánuðum eftir að hafa skráð sig í skólann. Vanalega þarf að skila margra ára rannsóknarvinnu til að öðlast slíka gráðu. Doktorsritgerð Bugabe hefur ekki verið gerð opinber.

Í frétt BBC segir að blaðið Zimbabwe Independent hafi eftir kennurum við skólann að þeir hafi ekki haft neina vitneskju um útskrift forsetafrúarinnar á sínum tíma, fyrr en eftir að fjölmiðlar sögðu frá málinu.

Greiddi leið Grace Mugabe

Robert Mugabe, eiginmanni Grace, var bolað úr embætti forseta Simbabve á síðasta ári, eftir að hafa stýrt landinu í 37 ár, fyrst sem forsætisráðherra og svo sem forseti.

Emmerson Mnangagwa, sem Mubage hafði nýverið rekið úr stóli varaforseta, tók við forsetaembættinu í landinu eftir að herinn átti þátt í að koma Mugabe frá.

Talið var að Robert Mugabe hafi með brottrekstri Mnangagwa verið að greiða leið eiginkonunnar Grace til að taka við forsetaembættinu af honum sjálfum síðar meir.