Kínverjar verjast ásökunum um mannréttindabrot

Yfirvöld Kína segja Michelle Bachelet, nýjum mannréttindastjóra Sameinuðu þjóðanna, að virða fullveldi Kínverja. Það sagði talsmaður utanríkisráðuneytis Kína í kjölfar þess að Bachelet kallaði eftir því að óháðum rannsakendum yrðu leyft að kanna ásakanir gegn Kínverjum um umfangsmikil mannréttindabrot á úígúra-minnihlutahópnum í vesturhluta Kína.



Kínverjar hafa verið sakaðir um að halda allt að milljón manna gegn vilja sínum í heilaþvottarbúðum í Xinjiang-héraði.

Sjá einnig: Kínverjar segja fréttir um stærðarinnar fangabúðir rangar



Kínverjar hafa mótmælt ásökunum um mannréttindabrot á úígúrum og segja múslima og úígúra njóta fullra réttinda en öfgamenn þurfi að sæta endurmenntun og vera fluttir um set.

Átök og óeirðir stinga reglulega upp kollinum í Xinjiang-héraði og þeim fylgja iðulega hörð viðbrögð stjórnvalda í Peking. Úígúrar eru um 45 prósent íbúa Xinjiang-héraðs, sem er tæknilega skilgreint sem „sjálfstjórnarsvæði“ innan Kína. Það er Tíbet einnig.