Börn á vettvangi í sextíu prósent útkalla í heimilisofbeldismálum

Börn eru á vettvangi heimilisofbeldis í sextíu prósent útkalla sem berast löggæsluyfirvöldum. Lögreglumaður sem sinnir málaflokknum segir mikilvægt að vinna traust þeirra strax í upphafi. Barn sem varð vitni að heimilisofbeldi vonar að ofbeldismaðurinn, faðir sinn, finni hamingjuna en það kemur fram í myndbandi sem Jafnréttisstofa mun senda frá sér á fimmtudaginn en hægt er að sjá hluta myndbandsins og frásögn barnsins í spilaranum hér neðar.

Myndbandið er hluti af vitundarvakningunni Þú átt VON sem verður sett af stað þann sama dag. Hún byggir á reynslu þolenda heimilisofbeldis og þeim úrræðum sem eru í boði. Á síðasta ári voru útköll vegna heimilisofbeldis tæplega fimmhundruð talsins og í þrjúhundruð þeirra voru börn á vettvangi. 

Guðbjörg Fjóla Ægisdóttir, lögreglumaður sem sinnir þessum málum á vettvangi, segir útköllum hafa fjölgað en verkferla lögreglu nokkuð skýra.

„Við reynum alltaf fyrst að aðskilja aðilana og tala við þá í sitthvoru lagi. Til að reyna að fá skýrari mynd hvað kom upp á, hvort að það sé einhver fyrri saga og hvort við getum aðstoðað. Ef það hefur verið eitthvað ofbeldi á milli aðilana þá er kallaður út rannsóknar lögreglumaður,” segir hún um fyrstu viðbrögð á vettvangi.

Hún segir það oft taka á að vera fyrst á vettvang, sérstaklega þegar börn hafi orðið vitni að ofbeldinu, sem sé of oft.

Hvernig bregðast börnin við þegar hjálp mætir á staðinn?

„Sum eru hrædd við lögregluna, sem er auðvitað algjör óþarfi en önnur sýna engin viðbrögð. Þetta er auðvitað mjög misjafnt,” segir hún.