Bíllaus lífsstíll í stað líkamsræktar

Maríanna Clara segir að lengi hafi staðið til að taka bílpróf en hún hefur ekki enn látið verða af því. Hún er þó komin með leyfi til æfingaaksturs. "Maðurinn minn er með bílpróf en við eigum ekki bíl. Við búum í miðbænum og það er stutt í allar áttir fyrir okkar, hvort sem við göngum eða hjólum. Ég labba í vinnuna á veturna en þegar fer að vora tek ég reiðhjólið fram. Ég á snjóbuxur og góða úlpu og mér finnst ekkert mál að labba í hvaða veðri sem er. Kannski er ég ekkert smart en mér er hlýtt og ég slepp við að vera föst í umferð. Það eru forréttindi að geta gengið með börnin í skólann og til dagmömmunnar. Þetta eru gæðastundir,“ segir hún.

Fór í splitt á meðgöngu

Maríanna Clara segist vera 25-35 mínútur að ganga til vinnu. Þótt gangan sé fín líkamsrækt segist hún stöku sinnum fara í Pilates hjá Láru Stefánsdóttur til að styrkja og liðka líkamann. „Mér fannst æðislegt að fara út að hlaupa en þarf þá að taka minn tíma í það sem ég á ekki mikið af. Gönguna getur maður tengt við daglegt líf og fengið hreyfingu um leið. Það skiptir miklu máli á sviði að vera í góðu formi og að líkaminn hlýði manni. Ef líkaminn virkar ekki er maður í vondum málum,“ segir Maríanna Clara sem vakti mikla athygli þegar hún tók sig til og fór í splitt í leiksýningunni Mamma Mia! en þar lék hún eina af vinkonunum. „Það þótti nú sumum frekar erfitt að horfa á mig fara í splitt komna sex mánuði á leið,“ segir Maríanna Clara og hlær.

Þessa dagana er hún að leika í Fólk, staðir og hlutir eftir Duncan Macmillan sem Gísli Örn Garðarsson leikstýrir á Litla sviðinu í Borgarleikhúsinu. Sýningin fjallar um áfengis- og pillusjúklinginn Emmu og hefur fengið feikigóða dóma. „Vinnutíminn er misjafn hjá okkur leikurum, á meðan æfingatíminn stendur yfir er maður í dagvinnu sem síðan breytist í kvöldvinnu þegar sýningar hefjast. Fólk, staðir og hlutir er sýnd fimm sinnum í viku og ég labba til vinnu en fæ stundum far til baka. Þegar fer að birta meira á kvöldin ætla ég að hjóla báðar leiðir.“

Sonurinn er grænmetisæta

Maríanna Clara segist hugsa hæfilega mikið um heilsuna. „Ég er í raun hófsemdarmanneskja, trúi því að allt sé gott í hófi. Maður eigi að borða allt og velja gott og hollt mataræði. Sonur minn er reyndar grænmetisæta þannig að við eldum oft grænmetisrétti. Hann tók þessa sjálfstæðu ákvörðun þegar hann var fjögurra ára að vilja ekki kjöt. Einn daginn sagði hann: „Ég heiti Dýri og elska dýrin.“ Fyrst hélt ég að þetta væru tiktúrur en svo reyndist það ekki vera. Hann er mjög duglegur að borða grænmeti og við reynum að hafa fjölbreyttan mat fyrir alla á matarborðinu.

Einu sinni vann ég í bókabúð og það var útsala á matreiðslubókum. Ég keypti nokkrar og þær vöktu áhuga minn á matargerð. Núna finnst mér gaman að prófa mig áfram með hina ýmsu rétti og þar á meðal úr grænmeti,“ segir hún og bætir við að það sama eigi við um líkamsræktina. „Best er að hún falli vel að hinu daglega lífi,“ segir Maríanna sem á tvö börn, sex ára son, Dýra, og átján mánaða dóttur, Míu. „Mig langar ekki að eyða löngum tíma í líkamsræktarsal í stað þess að vera með börnunum. Það er nógu erfitt að fara frá þessum krílum á hverju kvöldi,“ segir hún.

„Mér finnst samt alltaf gaman í vinnunni þegar ég er komin þangað. Þetta hefur verið góður vetur eftir mikla törn og krefjandi í Mamma Mia!. Þar á undan var ég í Línu Langsokk sem gekk í eitt og hálft ár. Ég lék sömuleiðis í Guð blessi Ísland sem sýnt verður aftur í haust. Það er skemmtilegur fjölbreytileiki í þessu starfi og stundum koma tímabil þar sem maður er mikið frá heimilinu en á móti koma æfingatímabil sem eru léttari. En alltaf er líf og fjör í leikhúsinu.“

Húsaskipti til Frakklands

Maríanna Clara hlakkar mikið til sumarsins. Þá tekur útivera og garðvinna við hjá henni. „Við ætlum að gera garðinn fallegan, taka til í skúrnum og síðan fara í húsaskipti við fjölskyldu í Frakklandi en það höfum við gert undan­farin sumur. Við höfum farið til Spánar og Frakklands og hlökkum mikið til að fara þangað aftur. Það er miklu ódýrara og þægilegra að fara í húsaskipti ef mann langar að ferðast með börnin. Við höfum verið mjög heppin með húsaskiptin.“

Maríanna Clara er bókmenntafræðingur að mennt auk þess að vera útskrifuð úr Leiklistarskóla Íslands. Hún skrifar bókmenntagagnrýni fyrir Tímarit Máls og menningar og Börn og menningu. „Með þessu rækta ég bæði líkama og sál,“ segir hún. „Ég var alltaf antisportisti þangað til ég byrjaði í Leiklistarskólanum. Þá fórum við í jóga, skylmingar, dönsuðum tangó og stunduðum sirkusfimleika en þá uppgötvaði ég að líkamsrækt þarf ekki að vera leiðinleg heldur getur verið mjög skemmtileg,“ segir Maríanna Clara.