Benitez vill að ummæli Zaha verði tekin fyrir

Rafael Benitez vill að enska knattspyrnusambandið taki fyrir ummæli Wilfried Zaha þar sem hann segist þurfa að fótbrotna til þess að andstæðingurinn fái rautt spjald fyrir að brjóta á honum.

Zaha lét orð sín falla eftir leik Crystal Palace og Huddersfield í ensku úrvalsdeildinni um síðustu helgi. Hann var þar að vitna í brot Mathias Jorgenson á sér, en Jorgenson fékk gult spjald fyrir að fella Zaha.

„Ég veit það fyrir víst að sumir ætla sér að reyna að meiða mig og ég veit ekki hvað ég á að gera lengur,“ sagði Zaha. „Ég enda á því að rífast við dómarana. Í dag þá fór andstæðingurinn með takkana í sköflunginn á mér, þurfa þeir að brjóta á mér fótinn til þess að fá rautt spjald?“

Samkvæmt heimildum Sky Sports fréttastofunnar þá munu dómarar í úrvalsdeildinni ekki breyta því hvernig þeir dæma brot á Zaha.

Benitez, sem mætir Zaha og félögum á morgun, sagðist vera hissa á ummælum Zaha.

„Hann er góður leikmaður, á því er enginn vafi, en ég held að enska knattspyrnusambandið verði að taka á þessum ummælum,“ sagði Benitez.

„Ég er viss um að Andre Marriner [dómari leiksins á morgun] muni ekki hafa hugan við orð Zaha í leiknum. Hann er mjög reyndur, þó hann sé kannski ekki með bestu ferilskránna þegar kemur að rauðum spjöldum, en ég hef trú á honum.“

Það hefur verið brotið 11 sinnum á Zaha í fimm leikjum í ensku úrvalsdeildinni til þessa. Hann var á meðal fimm efstu leikmannanna sem brotið var oftast á á síðasta tímabili.