Vilja skylda foreldra til að láta bólusetja börn

Norski Verkamannaflokkurinn telur að setja þurfi bólusetningar barna í lög. „Við teljum að það sé kominn tími til að taka það skref,“ segir Tuva Moflag meðlimur flokksins en hún er einnig meðlimur í heilbrigðisnefnd þingsins. Hún telur mjög alvarlegt að sumir foreldrar geri börnin sín berskjölduð fyrir hættunum sem fylgja því að vera óbólusett.

Í þessari viku voru greind þrjú mislingatilfelli í austurhluta Noregs en allir einstaklingarnir höfðu verið á ferðalagi erlendis, enginn þeirra var bólusettur. Samkvæmt frétt norska ríkisútvarpsins NRK er bólusetningartíðnin í Noregi þannig að 95,9 prósent tveggja ára barna í landinu voru bólusett samkvæmt tölum frá árinu 2016 en viðmið Alþjóðaheilbrigðismálastofnunarinnar er að 95 prósent ættu að vera bólusett.

Samkvæmt frétt NRK hefur Verkamannaflokkurinn lagt til að sem tilraunaverkefni verði bólusetningar gerðar að skyldu í Osló. Það er ekki ljóst hvort þetta frumvarp fái stuðning annarra flokka en mörgum finnst að með þessu sé of langt gengið.

NRK hefur eftir Høyres Sveinung Stensland í heilbrigðisnefndinni að bólusetningarkerfið þurfi að vera „byggt á trausti.“  Åse Michaelsen lýðheilsuráðherra hefur einnig látið í ljós efasemdir um frumvarpið.

Verkamannaflokkurinn leggur ekki til að foreldrum sem láta ekki bólusetja börnin sín verði refsað. Verður einfaldlega aðhald með þeim foreldrum og telur Moflag að það verði nóg til að hafa áhrif. Gagnrýnendur telja að þvinganir sem þessar gætu haft öfug áhrif, fleiri foreldrar láti bólusetja börn þegar það er þeirra val.