Þetta vitum við um árásina í Texas

Atli Ísleifsson skrifar 6. nóvember 2017 08:28

First Baptist Church í Sutherland Springs. Vísir/EPA

26 eru látnir eftir að karlmaður hóf skothríð í kirkju í Texas í morgun. Um er að ræða mesta fjöldamorðið í sögu Texas-ríkis.

Enn er margt á huldu varðandi málið en þetta vitum við um árásina.

26 eru látnir og tuttugu særðir eftir árásina sem gerð var í baptistakirkju í Sutherland Springs í Wilson-sýslu, smábæ um fimmtíu kílómetrum suðaustur af San Antonio.
Árásin var gerð klukkan 11:20 að staðartíma þegar svartklæddur karlmaður í skotheldu vesti byrjaði að skjóta fólk fyrir utan kirkjuna áður en hann hélt inn í þar sem sunnudagsmessa stóð yfir.
Maðurinn notaðist við hálfsjálfvirkt skotvopn, riffil af gerðinni Ruger AR-556.
Alls fundust lík 23 manna inni í kirkjunni, tveggja fyrir utan og svo lést einn á sjúkrahúsi.

Devin Patrick Kelley er grunaður um árásina.

Íbúi í bæ byrjar svo að skjóta í átt að árásarmanninum þegar hann kemur út úr kirkjunni. Hann hendir vopninu frá sér og flýr á brott í bíl sínum. Íbúinn hefur svo sjálfur eftirför.
Lögregla finnur síðar árásarmanninn látinn í bíl sem hafði hafnað utan vegar við sýslumörkin.
Ekki er ljóst hvort að maðurinn hafi svipt sig lífi eða hvort maðurinn sem veitti honum eftirför hafi skotið hann til bana. Nokkurt magn vopna fundust í bíl árásarmannsins
Að neðan má sjá viðtal KSAT-12 við Johnnie Langendorff, manninn sem veitti árásarmanninum eftirför.

Hin látnu eru á bilinu fimm til 72 ára. Á meðal hinna látnu er fjórtán ára dóttir prestsins, sem sjálfur var ekki á staðnum þegar árásin var gerð.
Sex ára drengur, sem varð fyrir fjórum skotum, hefur gengist undir aðgerð. Þá er tveggja ára barn einnig í hópi hinna særðu.

Lögregla segir manninn hafa verið 26 ára hvítur karlmaður, Devin Patrick Kelley frá San Antonio. Hann starfaði áður innan bandaríska flughersins en var látinn fara árið 2014 eftir að hafa verið dæmdur til árs fangelsisvistar fyrir ofbeldisbrot gegn konu sinni og barni.
Alls búa um fjögur hundruð manns í bænum Sutherland Springs.
Donald Trump Bandaríkjaforseti, sem nú er staddur í Japan, segir árásarmanninn hafa verið sturlaðan mann. Trump hafnaði því að hægt væri að kenna byssum um árásina.
Ekki er vitað um ástæður árásarinnar.

Tengdar fréttir

Árásarmaðurinn í Texas lést að lokinni eftirför lögreglu

Staðfest er að árásarmaðurinn í Texas sé látinn. Hann lést að lokinni eftirför. Óvíst er hvort hann hafi tekið eigið líf eða hvort hann hafi verið veginn.

6. nóvember 2017 00:15