Erlendur ferðamaður lést í Hljóðaklettum

Erlendur ferðamaður féll til bana fram af hamrabrún í Hljóðaklettum í dag. Lögreglan á Norðurlandi eystra segir að nánari tildrög slyssins liggi ekki fyrir. Maðurinn féll niður um fimmtán til tuttugu metra.

Í færslu á Facebook-síðu lögreglunnar á Norðurlandi eystra kemur fram að tilkynning um slysið hafi borist um kl. 15 í dag. Björgunarsveitir voru kallaðar út og aðstoðuðu þær lögreglu á vettvangi.

Landhelgisgæsla Íslands sendi þyrlu af stað en stuttu síðar var hún afturkölluð vegna þess að maðurinn var úrskurðaður látinn af læknum á vettvangi.

Ekki er grunur um að neitt saknæmt hafi átt sér stað. Rannsókn málsins heldur áfram og því segir lögreglan ekki hægt að veita frekari upplýsingar að sinni.