Erlent

Keypti 33 byssur á einu ári

Samúel Karl Ólason skrifar
Stephen Paddock myrti minnst 59 manns og særði rúmlega fimm hundruð.
Stephen Paddock myrti minnst 59 manns og særði rúmlega fimm hundruð. Vísir/AFP
Stephen Paddock, sem myrti 59 manns og særði rúmlega 500 í Las Vegas á aðfaranótt síðasta mánudags, hafði safnað byssum frá 1982 og á síðastliðnu ári hafði hann keypt 33 byssur. Þar af voru flestar þeirra hálfsjálfvirkir rifflar. Síðustu byssuna keypti hann þann 28. september. Sama dag og hann skráði sig inn á Mandaley hótelið sem hann skaut frá.

Allt í allt hafa yfirvöld fundið 47 skotvopn í eigu Paddock.

Paddock smyglaði fleiri en tuttugu byssum inn á hótelherbergi sitt og skaut svo á tónleikagesti hinum megin við götuna út um gluggann á herbergi sínu á 32 hæð.

Síðustu byssuna keypti hann í versluninni Guns & Guitars í Las Vegas. Framkvæmdastjóri verslunarinnar segir Paddock hafa keypt fimm byssur þar á einu ári. Á hótelherbergi hans fundust tólf byssur sem hann hafði breytt svo hægt væri að skjóta mörgum skotum úr þeim á skömmum tíma.

Jill Snyder, sem stjórnar rannsókn stofnunarinnar Alcohol, Tobacco and Firearms eða ATF, segir yfirvöld ekki fá tilkynningar um kaup margra riffla á skömmum tíma. Hins vegar séu kaup á tveimur eða fleirum skammbyssum tilkynnt til yfirvalda.

Breytingarnar sem um ræðir snúa að því að Paddock hafi bætt við byssurnar svokölluðu „Bump Fire“ skeftum. Það eru löglegar viðbætur við riffla sem gera notendum kleift að skjóta mörgum skotum á skömmum tíma.

Þar að auki hafði Paddock orðið sér út um magasín sem geyma allt frá 60 til hundrað skot, samkvæmt frétt Washington Post.

Enn er ekkert vitað um tilefni árásarinnar eða hvað Paddock stóð til. Andrew McCabe, háttsettur meðlimur Alríkislögreglu Bandaríkjanna, sagði CNN að það væri undarlegt að Paddock virtist ekki hafa skilið neitt eftir sig sem gæti varpað ljósi á ástæður hans. 

Kærasta Paddock er nú komin til Bandaríkjanna frá Filippseyjum og vonast rannsakendur til þess að hún geti varpað ljósi á tilefni árásarinnar. Paddock hafði aldrei komið við sögu lögreglu áður. Konan heitir Marilou Danley og er frá Ástralíu en á rætur sínar að rekja til Filippseyja.

Systur hennar sögðu fjölmiðlum ytra að þær teldu Paddock hafa sent Marilou Danley til útlanda svo hún myndi ekki reyna að koma í veg fyrir árásina. Vitað er að Paddock millifærði hundrað þúsund dali á reikning á Filippseyjum og leikur grunur á að Danley eigi þann reikning.



Sjá einnig: Millifærði hundrað þúsund dali á reikning á Filippseyjum



Þingmenn Repúblikanaflokksins hafa nú lagt frumvarp um að gera fólki auðveldara að kaupa hljóðdeyfa til hliðar um tíma. Frumvarpið snýr einnig að því að draga úr reglum varðandi flutning skotvopna á milli ríkja.

Þar að auki myndi frumvarpið draga úr reglum varðandi skotfæri sem eru hönnuð til að fara í gegnum brynvarnir.

Sjá einnig: Birtu myndband úr myndavélum lögregluþjóna sem skotið var á

Andstæðingar frumvarpsins segja að hljóðdeyfar muni gera lögregluþjónum og öðrum erfiðara að finna hvaðan verið sé að skjóta í tilfellum eins og í Las Vegas. Stuðningsmenn þess segja þó að hljódeyfar deyfi eingöngu hljóðið úr stórum rifflum. Því hjálpi þeir eingöngu við að vernda heyrnd löghlýðinna borgara.

Þá vinnur minnst einn af þingmönnum Demókrataflokksins að því að reyna að gera Bumper Fire skefti ólögleg, samkvæmt Washington Post.

Demókratar hafa farið víða um og fara fram á breytingar á vopnalöggjöfinni í Bandaríkjunum. Það hefur þó ekki fallið í kramið hjá repúblikönum og segja þeir ótímabært og óviðeigandi að ræða það að svo stöddu.

Repúblikanar hafa verið gagnrýndir fyrir að segja þetta um árabil og eftir fjölmörg fjöldamorð og árásir, eins og Stephen Colbert tók til dæmis saman í þætti sínum í gær.

Jimmy Kimmel sendi repúblikönum einnig tóninn.
Skotárás í Las Vegas Skotárásir í Bandaríkjunum

Tengdar fréttir

Segir Paddock hafa verið sjúkan

Donald Trump, forseti Bandaríkjanna, gaf í skyn í dag að hann myndi hefja umræðu um lög Bandaríkjanna varðandi byssueign.

Mest lesið


Fleiri fréttir

Sjá meira


×

Mest lesið