Ráðherra andvígur undanþágu frá lögum fyrir kísilver á Bakka

Reglurnar sem settar voru á Alþingi í vor eiga að gilda umsvifalaust og án undanþága, segir Björt Ólafsdóttir umhverfisráðherra, aðspurð um tillögu Umhverfisstofnunar að rekstrarleyfi fyrir PCC á Bakka.

Samkvæmt tillögunni fær kísilverið á Bakka heimild til að losa fjórfalt meira af ryki út í andrúmsloftið fyrstu tvö rekstrarárin en heimilt er samkvæmt Evróputilskipun sem var innleidd með lagabreytingu hér á landi í vor. Að þeim tíma liðnum ber kísilverinu halda sig innan við 5 milligrömm á rúmmetra en fær þó samkvæmt tillögu Umhverfisstofnunar að fjórfalda það losunarmagn 20 prósent starfstímans eða sem samsvarar 73 dögum á ári.

„Í rauninni er verið að lækka mörkin en hingað til hafa fyrirtæki fengið ákveðið svigrúm. Þetta er tillaga að útfærslu sem er nú til umsagnar og við hvetjum fólk til að senda okkur athugasemdir,“ segir Kristín Linda Árnadóttir, forstjóri Umhverfisstofnunar.

Kristín Linda bendir á að bæði stjórnvöld og fyrirtæki, þar á meðal Thorsil og United Silicon, hafi fjögur ár til að bregðast við þessum nýju skilyrðum.

Björt Ólafsdóttir umhverfisráðherra segir að hertu reglurnar hafi verið samþykktar með öllum greiddum atkvæðum á Alþingi í vor. „Það er mikilvægt að vilji kjörinna fulltrúa gildi umsvifalaust og án undanþága.“

Í tillögunni er einnig lagt til að aðrir stuðlar verði notaðir til útreiknings á þungmálmalosun, eftir óskum rekstraraðilans og að miðað verði við stuðla sem eru þróaðir af starfandi sérfræðingi hjá Elkem ASA Silicon Materials í Noregi. Nýju stuðlarnir taki meira tillit til notkunar en Kristín Linda segir þá gömlu gefa hærri losunartölur en raunin sé. „Markmið Umhverfisstofnunar er að ýta á fyrirtæki að styðjast við nákvæmari tölur frekar en reikningsstuðla,“ segir Kristín.

Ekki er sjálfgefið að nýju stuðlarnir eigi að gilda fyrir allar verksmiðjurnar og því mögulegt að mismunandi stuðlar gildi um þær silíkonverksmiðjur sem hér starfa. 

Björt segist ekki geta metið, að svo stöddu, hvaða stuðlar séu bestir en almennt hljóti að fara best á því að nota samræmd eftirlitstæki fyrir sambærilegar verksmiðjur. 

„Eftirlitið þarf að vera eins gegnsætt og kostur er til að almenningur hafi tök á að fylgjast með mengandi stóriðju í landinu.“