Tíu filippseyskir hermenn féllu í loftárás eigin hers

Tíu hermenn úr her Filippseyja féllu í gærkvöldi þegar stjórnarherinn gerði loftárás á borgina Marawi þar sem harðir bardagar hafa geisað síðustu daga.

Átta hermenn til viðbótar særðust en mistök urðu til þess að árásin var gerð á svæði þar sem menn úr sama liði voru saman komnir.

Talið er að allt að hundrað hafi fallið í bardögum í Marawi en stjórnarherinn hefur látið til skarar skríða gegn íslömskum vígasveitum sem lýst hafa yfir hollustu við ISIS.

Forseti Filippseyja, Rodrigo Duterte, setti herlög á eyjunni Mindanao í síðustu viku, en Marawi er ein af helstu borgum eyjunnar.