Hrafnistusamstæðan hótar leigendum sínum

Um þessar mundir er verið að rétta yfir tveim konum, sem ákærðar eru fyrir að ætla sér að kúga fé út úr fyrrverandi forsætisráðherra. En lögreglan kom og rannsakaði málið, sendi skýrslu til saksóknara, sem síðan lagði fram kæru í málinu. Og sjálfsagt hljóta þessar konur sinn dóm, vonandi sanngjarnan.

„Ólíkt höfumst við að“ sagði álfkonan í ævintýrinu. Á sama tíma er stórt húsaleigufélag hér á höfuðborgarsvæðinu að leika svipaðan leik og konurnar tvær. Þann 10. febrúar síðastliðinn var kveðinn upp dómur í Héraðsdómi Reykjavíkur, þar sem Naustavör ehf (dótturfélag Hrafnistu) var dæmt til að endurgreiða nokkrum leigendum sínum í Boðaþingi oftekin húsgjöld fjögur ár aftur í tímann. Aðrir íbúar sem svipað er ástatt um ættu að hafa sama rétt. Í þessum húsum eru 95 íbúðir og umræddar bætur geta numið allt að hálfri miljón á íbúð. Þarna er því um nokkra upphæð að ræða, samanlagt. Brottfluttir leigendur sem hér hafa dvalið um einhvern tíma síðastliðin fjögur ár eiga líka þennan sama bótarétt, eftir þeirri tímalengd sem búsetan stóð.

Viðbrögð þessa ágæta leigufélags eru ekki sú að endurgreiða leigendum sínum þær fjárhæðir sem dómurinn ákvað. Öðru nær. Í þess stað senda þeir öllum íbúum hér bréf, þar sem farið er fram á að þeir falli frá öllum kröfum sínum á hendur Naustavarar ehf, ella verði þeim sagt upp húsnæðinu. Þeim leigendum sem ekki ganga að þessum afarkostum er sagt að þeim verði boðinn nýr leigusamningur „á öðrum kjörum“. Engin nánari skilgreining hefur fengist á því hver þau kjör muni verða.

Ekki fæ ég betur séð en þarna sé um fjárkúgun að ræða, svipaða og Sigmundur Davíð varð fyrir. Meðalaldur fólks í þessum íbúðum er um það bil 82 ár. Að hóta fólki á þessum aldri því, að ef þau neita að falla frá lögvörðum kröfum af þessu umfangi, þá verði þeim sagt upp húsnæðinu er að mínu mati ekkert annað en fjárkúgun. 

Hver verða viðbrögð þjóðfélagsins? Vill lögreglan rannsaka þetta sem tilraun til ólögmætrar nauðungar? Verði svo – mun þá saksóknari ákveða að ákæra Naustavör ehf? Það verður fróðlegt að fylgjast með framvindunni.