Gekk fram á ferðamenn gera þarfir sínar í Hallargarðinum

Íbúi í miðbæ Reykjavíkur, sem var á heimleið aðfararnótt sunnudags, gekk fram á tvo ferðamenn gera þarfir sínar í Hallargarðinum svokallaða, skrúðgarði við Skothúsveg og Fríkirkjuveg. Ferðamennirnir höfðu lagt svokallaðri camper-bifreið á Skothúsvegi og ætluðu að gista þar. Aðalvarðstjóri hjá lögreglunni á höfuðborgarsvæðinu segir greinilega aukningu hafa orðið í ferðamönnum sem notast við bifreiðarnar innan borgarmarkanna.

Þorsteinn Björnsson, nemi við Háskóla Íslands, greindi frá atvikinu í stöðuuppfærslu á Facebook í gær. Hann gekk fram á ferðamennina, karl og konu, þar sem þau höfðu lagt camper-bifreið sinni við Skothúsveg og gerðu þarfir sínar í Hallargarðinum, sem liggur að Skothúsvegi og Frikirkjuvegi.

„Ég var á leið heim úr bænum um klukkan tvö aðfararnótt sunnudags og ákvað að labba í gegnum Hallargarðinn við Skothúsveg. Þar blasa við mér tveir ferðamenn, hjón á miðjum aldri, gera þarfir sínar þarna í þessum virðulega garði. Ég ætlaði að hringja í lögregluna og tilkynna þetta en var ekki með símann á mér.“

Segir atvikið ekki einsdæmi

Þorsteinn segir fólkið hafa athafnað sig á bak við runna hjá tröppum sem liggja niður í garðinn frá Skothúsvegi. Hann segir karlinn hafa verið í miðjum klíðum þegar hann kom að þeim en konan virtist hafa nýlokið sér af.

„Karlinn var þarna semsagt í miðjum skítverkum en konan var nálægt og það leit út eins og hún hefði líka verið að gera sínar þarfir þarna,“ segir Þorsteinn. „Það fauk svolítið í mig því þetta hefur náttúrulega verið í umræðunni. Sérstaklega vegna þess að þau voru á svokallaðri camper-bifreið, sem þau höfðu lagt þarna á horni Skothúsvegar og Fjólugötu og ætluðu að gista þar,“ segir Þorsteinn. Af framburði fólksins að dæma telur Þorsteinn líklegast að um Frakka hafi verið að ræða þó að hann geti ekki fullyrt um það.

Þorsteinn er sjálfur búsettur í miðbænum, skammt frá Hallargarðinum, og hann segir atvikið ekki einsdæmi. Hann hefur reglulega tekið eftir camper-bifreiðum sem ferðamenn hafa lagt í grennd við Hljómskálagarðinn og hyggjast gista í. Bifreiðarnar eru ekki búnar salernum og hafa ferðamenn því þurft að gera þarfir sínar annars staðar.

„Þegar ég predikaði yfir þeim urðu þau svolítið skelkuð og afsökuðu sig með því að það væru engin klósett hérna í kring og þau hefðu þess vegna þurft að gera þarfir sínar í garðinum.“

Þorsteinn segir ljóst að eitthvað verði að gera í þessum málum, bæði hvað varðar bifreiðarnar, sem ferðamennirnir leggja í miðbænum, og salernisaðstöðu í borginni.

Sjá einnig: Ferðamenn halda til á bílastæði í Laugardal

Mikil aukning í hópi erlendra ferðamanna á camper-bílum

Sigurbjörn Jónsson, aðalvarðstjóri hjá lögreglunni á höfuðborgarsvæðinu, segir í samtali við Vísi að hann hafi ekki heyrt af þessu tiltekna máli um helgina.

„Ég er bara að heyra þetta fyrst núna,“ segir Sigurbjörn. „Þeir eru nú samt að sofa mikið þarna í Tjarnargötunni, ferðamennirnir, og við höfum beðið íbúana að hafa samband við okkur ef þeir sjá svona bíla þar. Þeir hafa líka verið mikið úti í Gróttu á Seltjarnarnesi.“

Hann segir að þessum bílum eigi að leggja á tjaldstæðum og að allar tilkynningar um bílana utan tjaldstæðanna séu skoðaðar. Hann segir enn fremur að mikil aukning hafi orðið í hópi ferðamanna sem kjósa bílana sem fararmáta á höfuðborgarsvæðinu.

Salernisvenjur ferðamanna viðvarandi vandamál

Umfjöllun um ferðamenn sem gera þarfir sínar undir beru lofti og utan salerna hefur farið hátt síðustu vikur og mánuði, sérstaklega atvik á fjölsóttum ferðamannastöðum úti á landi. Á Þingvöllum hefur vandinn verið mjög áberandi, þrátt fyrir að salernum hafi verið bætt við.

„Það eru núna 75 salerni í þjóðgarðinum og hvar sem maður er eru ekki nema örfáar mínútur að næsta salerni,“ sagði Ólafur Örn Haraldsson, þjóðgarðsvörður á Þingvöllum í samtali við Fréttablaðið í lok júní. „Þrátt fyrir það leyfir fólk sér að gera þetta.”

Aðspurður hvort lögreglan á höfuðborgarsvæðinu sjái ástæðu til að beita sér sérstaklega gegn óþrifnaði af þessu tagi í borginni segir Sigurbjörn það ekki hafa komið til tals.

„Nei, við höfum ekki verið að fylgjast sérstaklega með því hvar fólkið kúkar.“

Færslu Þorsteins má lesa í heild sinni hér að neðan.