Maður stöðvaður með sverð á Rauðarárstíg

Lögreglumenn höfðu afskipti af manni sem var vopnaður sverði á Rauðarárstíg í Reykjavík í gærkvöldi. Lögðu þeir hald á sverðið en maðurinn olli síðar ónæði í porti lögreglustöðvarinnar við Hverfisgötu.

Í dagbók lögreglunnar á höfuðborgarsvæðinu kemur fram að maðurinn hafi verið stöðvaður laust eftir kl. 23 í gærkvöldi. Eftir að sverðið var tekin af honum vegna rannsóknar máls birtist hann í porti lögreglustöðvarinnar og vildi ekki fara að tilmælum lögreglu.

Hann fékk fyrir vikið að gista í fangageymslu lögreglunnar í nótt.

Töluvert var um ölvunar- og lyfjaakstur í borginni í nótt. Þannig eru tveir ökumenn grunaðir um að hafa valdið tjóni undir áhrifum í Hafnarfirði og Grafarholti.

Báðir lentu þeir í umferðaróhöppum en stungu af vettvangi. Lögregla hafði hendur í hári beggja. Sá í Hafnarfirði er grunaður um ölvunarakstur og hefur aldrei öðlast ökuréttindi en tveir menn sem voru í bílnum í Grafarholti eru grunaðir um að hafa verið undir áhrifum áfengis og fíkniefna, akstur utan vegar og ítrekaðan akstur sviptir ökuréttindum.