Hafnar því alfarið að 100 samkynhneigðir menn hafi verið handteknir

Rússneska dagblaðið Novaya Gazette, segist hafa heimildir fyrir því að lögregla í Téteníu, héraði í Rússlandi, hafi handtekið 100 menn grunaða um samkynhneigð. AP greinir frá.

Í laugardagsútgáfu rússneska blaðsins segir að blaðamenn hafi fengið staðfestingu á handtökunum innan stjórnkerfisins í Téteníu.

Þá er einnig greint frá því að þrír af þeim sem handteknir voru hafi látist.

Talsmaður forseta Téteníu, Ramzan Kadyrov, hafnar þessum ásökunum og sagði að raunar að samkynhneigð fyrirfinndist ekki í héraðinu.

„Það er ómögulegt að ofsækja þá sem eru ekki til staðar,“ sagði talsmaðurinn.

Kadyrov, sem nýtur stuðnings Vladimirs Putins, Rússlandsforseta, hefur í gegnum tíðina verið sakaður um ýmiskonar mannréttindabrot.