Töpuðu leik 102-0 eftir að undirbúa sig í tvær vikur

Ótrúlegur körfuboltaleikur átti sér stað í Bandaríkjunum á föstudaginn í síðustu viku þegar að menntaskólaliðin Froid-Medicine Lake girls og Brockton mættust.

Froid-Medicine vann leikinn, 102-0, en þetta er aðeins í 20. sinn í ríflega 100 ára sögu körfuboltans í Bandaríkjunum sem að lið skorar ekki stig í alvöru mótsleik.

Brockton vissi að leikurinn yrði erfiður. Froid-Medicine byrjaði með þrjá leikmenn sem voru hærri en 182 cm á meðan gestirnir voru ekki með eina stelpu í liðinu sem var hærri en 170 cm. SB Nation greinir frá.

Brockton-liðið var samt með leikáætlun og undirbjó sig vel fyrir leikinn eða allt fram að því að hver leikmaðurinn á fætur öðrum fór að hringja í þjálfarann og tjá honum að hann kæmist ekki í leikinn.

Gestirnir mættu því aðeins með fimm leikmenn, þar á meðal eina stelpu úr áttunda bekk og aðra stúlku á öðru ári sem var ekki búin að spila körfubolta síðan hún var ellefu ára gömul.

„Við vissum út í hvað við forum að fara. Við eyddum tveimur vikum í að undirbúa okkur fyrir leikinn en síðan erum við allt í einu bara með fimm leikmenn til taks og þá fór leikáætlunin út um gluggann. Við hættum að taka tölfræði í fyrsta leikhluta. Ég er ekki alveg viss um hvort okkur tókst að ná tíu skotum á körfuna,“ sagði Terrance Johnson, þjálfari Brockton, í viðtali við staðarblaðið Great Falls Tribune.

Staðan í hálfleik var 59-0 og létu dómararnir klukkuna bara ganga í seinni hálfleik til þess að minnka skaðann. Það dugði skammt en dómararnir fengu nóg þegar að einn leikmaður Brockton meiddist undir lokin. Gestirnir voru ekki með neinn varamann svo dómararnir stóðu bara yfir henni á meðan leiktíminn rann sitt skeið á enda.

„Ég veit að dómararnir hefðu getað hætt leik þegar að þetta var allt farið úr böndunum,“ sagði Lance Brekke, þjálfari, Froid-Medicine.