Jólaspá Siggu Kling - Tvíburinn: Hangir yfir þér ský sem dregur úr krafti þínum til að sjá sólina

Elsku Tvíburinn minn! Það er ekki alveg hægt að segja þú elskir íslenska veturinn og þar sem þú ert þessi týpa sem vilt vera sólarmegin í lífinu skaltu hlusta á sjálfan þig þegar þú ert að segj öðrum hvernig þeir eigi að leysa málin og fara kannski eftir þeirri speki sjálfur.

Þú ert svo dásamleg persóna og þér hentar vel að hjálpa og ráðleggja öðrum því í þér býr sálfræðingur. Fram undan eru einhvers konar ferðalög, eða að þú færir þig til og þá áttu eftir að kippast alveg í gírinn og ekki bíða eftir að aðrir segi þér hvert þú átt að fara eða hvað þú átt að gera, heldur taktu sjálfur ákvörðun, þá er eins og aðrir fylgi með þér.

Ef þú ert með kveikt á ástarljósinu eða háu ljósunum þegar þú sperrir bringuna eins og fuglarnir gera, þá verður algjörlega tekið eftir þér, en þú verður að nenna ástinni til að ástin nenni þér.

Styrkur þinn snýst samt um það hversu mikið góðmenni þú ert og ekki að þú ráðir eða stjórnir öðrum, því þú ert eina manneskjan sem þú virkilega berð ábyrgð á. En til þess að vera vel tengdur öðru fólki í kringum þig er mikilvægt að þú takir núna ákvörðun í þeim málum sem þú hefur haft áhyggjur af og veist ekki hvernig þú átt að leysa.

Það á það til að hanga yfir þér ský sem dregur úr krafti þínum til að sjá sólina, svo þú þarft að minna þig stanslaust á að þú ert manneskja sem hefur þann kraft að geta gefið öðrum ást og styrk, og þar sem þú getur það, geturðu að sjálfsögðu gefið sjálfum þér það líka.

Þú ert svo mikið fyrir ljós og þess vegna skaltu skreyta mikið í kringum þig og hafa mikið af ljósum. Það er svo magnað hvað litlir hlutir eins og ljós geta breytt tilfinningum þínum. Þú átt það til að fara í kvíðagírinn, en þú skalt breyta kvíðanum yfir í spennu og tilhlökkun og segðu: Ég er spenntur fyrir hlutunum, allt gengur vel og ég hlakka til!

Frægir Tvíburar: Ragnar Sigurðsson landsliðsmaður, Örn Árnason leikari, Óli Geir Jónsson plötusnúður, Bjarni töframaður, Hrund Þórsdóttir fréttakona, Össur Skarphéðinsson húmoristi, Johnny Depp leikari, Páll Magnússon fjölmiðlamaður, Kjartan Atli Kjartansson lífsspekúlant, Heimir Hallgrímsson landsliðsþjálfari, Gunnar Einarsson, bæjarstjóri Garðabæjar, Andri Freyr útvarpsmaður og Lýðveldið Ísland, Donald Trump, Þórarinn Þórarinsson blaðamaður, Bjartmar Guðlaugsson, söngvari og snillingur, Jóhanna Heiðdal lögfræðingur.

Setningin til þín er: Ég hlakka svo til, það má – Ég hlakka svo til (Svala Björgvins)