Innlent

Fyrsti bóksölulisti ársins: Arnaldur, Ragnar og Jón Kalman á toppnum

Jakob Bjarnar skrifar
Glæpasagnahöfundarnir halda sjó en Jón Kalman er til alls líklegur.
Glæpasagnahöfundarnir halda sjó en Jón Kalman er til alls líklegur.
Eins og undanfarin ár mun Vísir fylgjast með bóksölu fyrir þessi jólin. Hér getur að líta fyrstu bóksölulistana sem byggir á upplýsingum sem Félag íslenskra bókaútgefenda tekur nú saman.

Bryndís Loftsdóttir, framkvæmdastjóri Fibut, segir að þó þarna sjáist gróf mynd af því sem koma skal í bóksölu fram að jólum þá skekkir það myndina hversu margar bækur eru að koma seint til landsins vegna bilana í prentsmiðjum erlendis og ófara í flutningum.

Samkvæmt heimildum Vísis hefur fólk innan bókageirans af þessu nokkrar áhyggjur. Prentun bóka hefur átt undir högg að sækja og prentsmiðjan Oddi er hætt að prenta innbundnar bækur í byrjun næsta árs. Að sögn Kristjáns Geirs Gunnarssonar, framkvæmdastjóra markaðs- og sölusviðs Odda, var aðeins verið tímaspursmál hvenær slík ákvörðun yrði tekin.

Fáir þekkja bókabransann betur en Bryndís Loftsdóttir. Vísir nýtur fulltingis hennar við að rýna í bóksöluna fyrir þessi jólin.
Ástæðan er rakin til gengis krónunnar, miklu hagstæðara er fyrir útgefendur að láta prenta bækurnar utan landsteina en sá böggull fylgir skammrifi sem Bryndís nefnir.

Finnskir prentarar setja strik í reikninginn

Bookwell í Finnalandi hefur verið að prenta íslenskar bækur en prentsmiðjan sú klikkaði illilega fyrir nokkrum vikum sem olli því að öllu því sem þar var prentað seinkaði. „Þetta er risastór prentsmiðja sem er í gangi 24/7 og hún var stopp vel á aðra viku,“ segir Bryndís.

Á mánudaginn 22. nóvember var síðasti frestur til að láta endurprenta bækur svo þær næðu í tæka tíð til landsins fyrir jólabókavertíðina miklu. Þetta þýðir í raun að svo gæti farið að einhverjar bækur verði hreinlega uppseldar, það fer eftir því hversu klókir útgefendur eru að meta eftirspurnina fyrirfram. En, þetta kemur að einhverju leyti í veg fyrir hið svokallaða „svarta hross“ – óvæntar metsölubækur. En, þó má sjá við slíku með pöntun á prenti og flugfrakt. En, það kostar vitaskuld sitt.



Glæpasögurnar halda sínu

Bókabransinn er því í járnum. En, listarnir segja sína sögu. Arnaldur Indriðason er með mest seldu bók þessara fyrstu vikna í nóvember, enda kom bókin hans út á réttum tíma, ef svo má segja, en hans bækur koma alltaf út þann 1. nóvember.

Birgitta Haukdal hefur slegið í gegn sem barnabókahöfundur.
Íslenskar skáldsögur eru í efstu þremur sætum tímabilsins. Glæpasögurnar virðast ætla að halda sínu auk þess sem Jón Kalmann blandar sér í þann slag með Sögu Ástu. Þá kemur Ragnar Jónasson í því þriðja með Mistur. Gatið, bók Yrsu Sigurðardóttur sem kom út í síðustu viku, er svo komin í fjórða sæti skáldsögulistans eftir aðeins nokkra daga sölu og mun líkast til klifra hærra á næstu vikum en hún er í sjötta sæti aðallistans.

Barnabókahöfundar gera sig breiða

En, svo eru það sértækari listar en aðallistinn sem gaman er að rýna í. Barnabókahöfundar hafa verið að gera sig breiða í bóksölu undanfarin árin og svo verður sennilega í ár einnig.

„Gamlar kempur eru áberandi á barnabókalistanum, Birgitta Haukdal, sem slegið hefur í gegn með Láru bókunum sínum situr í þriðja sæti en á jafnframt tvær aðrar bækur neðar á listanum, sem er ákveðið afrek í sjálfu sér.

Mikael Torfason hefur tekið forystu í ævisagnagerðinni í margvíslegum skilningi.
 Ævar Þór Benediktsson er í öðru sæti með fjórðu bókina í bókaflokknum „Þín eigin“ en að þessu sinni dregur hann lesendur inn í heim ævintýranna.  Í fyrsta sæti er svo hinn þaulreyndi metsöluhöfundur, Gunnar Helgason, með þriðju bókina um Stellu og fjölskyldu hennar,“ segir Bryndís.

Þróun í ævisagnagerð

Ævisagnalistinn er spennandi sem slíkur og einnig sem fyrirbæri. Ævisögur hafa stundum átt jólabókasöluna en gengi slíkra bóka hefur hins vegar verið svipaður því hvernig gengur til með rjúpnastofninn. Þar gengur á með reglubundnum sveiflum, þær hafa verið að toppa með um tíu ára millibili. Hins vegar má greina einhverar breytingar í þeim efnum sem eru bókmenntafræðilegs eðlis. Úti í hinum stóra heimi hafa „non fiction“ bækur lengi átt sviðið.

Við Íslendingar erum í ýmsu tilliti 10 til 20 árum á eftir tímanum þegar stefnur og straumar erlendis eru annars vegar. Má kannski nefna pönktímabilið sem dæmi í því samhengi. Nú virðist þessi bylgja vera að ná ströndum Íslands og þar leiðir kannski Mikael Torfason, sem hefur sagt skálduðum ævisögum stríð á hendur og ráðist með sleggju á þann múrvegg sem hefur verið byggður milli skáldskapar og svo endurminninga. Það fer því ágætlega á því að hann sé þar á toppi lista.

Sólrún Diegó er óvæntasta nafnið í jólabókaflóðinu að þessu sinni.
„Já, Mikael er efstur á ævisagnalistanum. Í öðru sæti er svo mest selda bók ársins, hingað til, en það er saga hinnar Norður-Kóresku Yeomne Park, Með lífið að veði. Í þriðja sæti er svo bókin Þúsund kossar eftir Jón Gnarr.

Samfélagsmiðlastórstjarnan Sólrún Diego

„Óvæntasta innslag listans að þessu sinni er bókin Heima með samfélagsmiðlastórstjörnunni Sólrúnu Diego,“ segir Bryndís sem aðstoðar Vísi við að rýna í listana. Fáir þekkja betur til en einmitt hún þegar bóksalan er annars vegar. Og þetta þykir henni merkilegt.

„Í bókinni gefur hún góð ráð varðandi heimilisþrif og hagnýt húsráð en bókin situr í fyrsta sæti listans yfir fræðibækur og bækur almenns efnis og skákar þar refum eins og Jóni Steinari Gunnlaugssyni sem situr í öðru sæti listans með bókina Með lognið í fangið og Óttari Sveinssyni sem situr í því þriðja með Útkall – Reiðarslag í Eyjum.“

En, við skulum láta listana tala sínu máli.

Topplistinn     

20 söluhæstu titlar Bóksölulistans                                                                                                      



  1. Myrkrið veit / Arnaldur Indriðason                        
  2. Saga Ástu / Jón Kalman Stefánsson                       
  3. Mistur / Ragnar Jónasson                         
  4. Amma best / Gunnar Helgason               
  5. Gagn og gaman / Helgi Elíasson og Ísak Jónsson                              
  6. Gatið / Yrsa Sigurðardóttir                        
  7. Þitt eigið ævintýri / Ævar Þór Benediktsson                       
  8. Jólaprjón / Guðrún S. Magnúsdóttir                     
  9. Ekki vera sár / Kristín Steinsdóttir                           
  10. Syndafallið / Mikael Torfason                  
  11. Jól með Láru / Birgitta Haukdal                
  12. Litla bókabúðin í hálöndunum / Jenny Colgan                  
  13. Settu saman mannslíkamann / Richard Walker                
  14. Heima / Sólrún Diego                  
  15. Með lífið að veði / Yeomne Park                           
  16. Sakramentið / Ólafur Jóhann Ólafsson               
  17. Saga þernunnar / Margaret Atwood                     
  18. Með lognið í fangið / Jón Steinar Gunnlaugsson                             
  19. Flóttinn hans afa / David Walliams                         
  20. Útkall, Reiðarslag í Eyjum / Óttar Sveinsson                     
                                             

Íslensk skáldverk                                                          

  1. Myrkrið veit / Arnaldur Indriðason                        
  2. Saga Ástu / Jón Kalman Stefánsson                       
  3. Mistur / Ragnar Jónasson                         
  4. Gatið / Yrsa Sigurðardóttir                         
  5. Ekki vera sár / Kristín Steinsdóttir                           
  6. Sakramentið / Ólafur Jóhann Ólafsson               
  7. Skuggarnir / Stefán Máni                           
  8. Blóðug jörð / Vilborg Davíðsdóttir                          
  9. Smartís / Gerður Kristný                             
  10. Örninn og fálkinn / Valur Gunnarsson                 
                                             

Þýdd skáldverk                                              

  1. Litla bókabúðin í hálöndunum / Jenny Colgan                  
  2. Saga þernunnar / Margaret Atwood                     
  3. Kanínufangarinn / Lars Kepler                  
  4. Sögur frá Rússlandi / Ýmsir                        
  5. Ósýnilegi verndarinn / Dolores Redondo                            
  6. Blóð í snjónum / Jo Nesbø                         
  7. Hnotskurn / Ian McEwan                          
  8. Afætur / Jussi Adler-Olsen                       
  9. Ítalskir skór / Henning Mankell                
  10. Talin af / Sara Blædel                    
                                             

Ljóð & leikrit                   

  1. Heilaskurðaðgerðin / Dagur Hjartarson               
  2. Millilending / Jónas Reynir Gunnarsson                              
  3. Fiskur af himni / Hallgrímur Helgason                   
  4. Kóngulær í sýningargluggum / Kristín Ómarsdóttir                         
  5. Dvalið við dauðalindir / Valdimar Tómasson                      
  6. Slitförin / Fríða Ísberg                  
  7. Gamanvísnabókin / Ragnar Ingi Aðalsteinsson tók saman                         
  8. Lífsblóm / Sigurður Hallur Stefánsson                   
  9. Bónus ljóð / Andri Snær Magnason                       
  10. Flórída / Bergþóra Snæbjörnsdóttir                      
                                             

Barnabækur - skáldverk                                                                                            

  1. Amma best / Gunnar Helgason               
  2. Þitt eigið ævintýri / Ævar Þór Benediktsson                       
  3. Jól með Láru / Birgitta Haukdal                
  4. Flóttinn hans afa / David Walliams                         
  5. Henri hittir í mark / Þorgrímur Þráinsson                             
  6. Lára fer í sund / Birgitta Haukdal                             
  7. Verstu börn í heimi / David Walliams                    
  8. Kósýkvöld með Láru / Birgitta Haukdal                 
  9. Bakarísráðgátan / Martin Widmark                        
  10. Hvernig passa á ömmu / Jean Reagan                  
                                             

Barnafræði- og handbækur                                                                     

  1. Gagn og gaman / Helgi Elíasson og Ísak Jónsson                              
  2. Settu saman mannslíkamann / Richard Walker                
  3. Frábærlega framúrskarandi konur / Kate Pankhurst                     
  4. Stjörnuskoðun fyrir alla fjölskylduna / Sævar Helgi Bragason                    
  5. Skrifum stafina - Rósakot                           
  6. Dýrin á Hóli - púsl og bók / Unga ástin mín                         
  7. Hver er mamma mín? / Unga ástin mín
  8. Þegar ég verð stór - landsliðið / Gemma Cary   
  9. Skafmyndalist / Setberg              
  10. Fyrstu orðin : púslubók / Unga ástin mín            
                                             

Ungmennabækur                          

  1. Galdra Dísa / Gunnar Theodór Eggertsson                        
  2. Er ekki allt í lagi með þig? / Elísa Jóhannsdóttir                 
  3. Vetrarfrí / Hildur Knútsdóttir                    
  4. Vetrarhörkur / Hildur Knútsdóttir                          
  5. Harry Potter og bölvun barnsins / J.K. Rowling                
  6. Sölvasaga unglings / Arnar Már Arngrímsson                    
  7. 172 tímar á tunglinu / Johan Harstad                     
  8. Nei, nú ert'að spauga, Kolfinna! / Hrönn Reynisdóttir                  
  9. Skuggasaga : Arftakinn / Ragnheiður Eyjólfsdóttir                          
  10. Leitin að Alösku / John Green                  
                                             

Fræði og almennt efni                

-að undanskildum matreiðslu- og handavinnubókum                                

  1. Heima / Sólrún Diego                   
  2. Með lognið í fangið / Jón Steinar Gunnlaugsson                             
  3. Útkall - Reiðarslag í Eyjum / Óttar Sveinsson                    
  4. Vertu úlfur / Héðinn Unnsteinsson                      
  5. Geymdur og gleymdur orðaforði / Sölvi Sveinsson                       
  6. Auðnustjarnan / Örn Sigurðsson                           
  7. Til orrustu frá Íslandi / Illugi Jökulsson                 
  8. Borgin - heimkynni okkar / Hjálmar Sveinsson / Hrund Skarphéðinsdóttir                          
  9. Draumaland : svefn og svefnvenjur / Arna Skúladóttir                 
  10. Hönnun : leiðsögn í máli og mynd / Ýmsir                           
                                             

Ævisögur                                                                          

  1. Syndafallið / Mikael Torfason                  
  2. Með lífið að veði / Yeomne Park                           
  3. Þúsund kossar - Jóga / Jón Gnarr                           
  4. Rúna - Örlagasaga / Sigmundur Ernir Rúnarsson                              
  5. Helgi : minningar Helga Tómassonar / Þorvaldur Kristinsson                      
  6. Claessen : saga fjármálamanns / Guðmundur Magnússon                         
  7. Fjallið sem yppti öxlum / Gísli Pálsson                  
  8. Ekki gleyma mér / Kristín Jóhannsdóttir                              
  9. Elly – ævisaga / Margrét Blöndal                             
  10. Ég er Malala / Malala Yousafazai                             
                                             

Matreiðslu- og handverksbækur                                                                                          

  1. Jólaprjón / Guðrún S. Magnúsdóttir                     
  2. Heklaðar tuskur / C. S. Rasmussen / S. Grangaard                         
  3. Prjónaðar tuskur / Helle Benedikte Neigaard                  
  4. Pottur, panna og Nanna / Nanna Rögnvaldardóttir                        
  5. Stóra smákökubókin / Fanney Rut Elínardóttir                 
  6. Veisluréttir Hagkaups / Friðrika Hjördís Geirsdóttir                        
  7. Grillréttir Hagkaups / Hrefna Rósa Sætran                         
  8. Himneskt - að njóta / Sólveig Eiríksdóttir                            
  9. Sætmeti án sykurs og sætuefna / Nanna Rögnvaldardóttir                        
  10. Brjálæðislega róandi / Sævar Jóhannesson                       



Fleiri fréttir

Sjá meira


×