Martin bar af í Tékklandi

Íslenska karlalandsliðið í körfubolta laut í lægra haldi fyrir því tékkneska, 89-69, í fyrsta leik sínum í undankeppni HM 2019 í gær. Tékkar voru alltaf með forystuna og gáfu alltaf í þegar Íslendingar gerðu sig líklega til að koma með áhlaup.

Íslenska liðið hitti skelfilega illa fyrir utan þriggja stiga línuna og var líka undir í frákastabaráttunni sem tapaðist 37-27.

„Við vorum í vandræðum með stærðina á þeim allan tímann. Í þau skipti sem við náðum að stoppa í fyrri hálfleik tóku þeir oftast sóknar­fráköst. Við vorum í miklu basli í frákastabaráttunni. Við spiluðum oft á tíðum ágætis vörn en það vantaði að klára hana með frákasti. Við gáfum þeim alltof mörg aukatækifæri,“ sagði Finnur Freyr Stefánsson, aðstoðarþjálfari íslenska liðsins, í samtali við Fréttablaðið í gær.

Þriggja stiga nýting Íslands var afleit en íslensku strákarnir hittu aðeins úr fjórum af 24 þristum sem þeir tóku (17%).

„Við klikkuðum oftar en ekki á stemningsþristum. Við bjuggum okkur til fín færi fyrir utan en öll stemningsskotin klikkuðu,“ sagði Finnur sem hrósaði Kára Jónssyni sem setti niður þrjá af fjórum þristum Íslands.

„Hann sýndi öryggi eins og alltaf. Það skiptir ekki máli þótt hann sé að spila á móti stærri og sterkari mönnum. Hann var öruggur með boltann og tók góðar ákvarðanir. Hann gerði mjög vel.“

Martin Hermannsson bar af í íslenska liðinu og skoraði 29 stig. Hann var stigahæstur á vellinum. Martin hitti úr sjö af 13 skotum sínum utan af velli og öllum 15 vítaskotunum.

„Hann dró vagninn í sókninni. Hann var duglegur að sækja á körfuna, fékk 15 víti og hefði getað fengið fleiri. Hann er einn okkar allra besti leikmaður. Hann sýndi í kvöld hversu mikilvægur hann er og framtíðin í þessu liði,“ sagði Finnur.

Íslenska liðið kemur heim frá Tékklandi í dag. Á mánudaginn mæta Íslendingar svo Búlgörum í öðrum leik sínum í undankeppninni. Hvað þarf að ganga upp hjá íslenska liðinu, til að það vinni það búlgarska?

„Vörn og fráköst eru fasti sem þarf að vera til staðar. Við þurfum að ná betri takti í varnarleiknum,“ sagði Finnur.

Íslenska liðið fær góða hjálp í baráttunni inni í teig gegn Búlgörum því Tryggvi Snær Hlinason verður með á mánudaginn.

„Hann gefur okkur allt annað yfirbragð. Hann ver teiginn vel. Það verður gríðarlega mikill munur að fá hann inn í teiginn, bæði í vörn og sókn,“ sagði Finnur að lokum.