Stórlaxar af Suðurnesjum ósáttir við Pedersen: „Léleg stjórnun af bekknum“

Craig Pedersen, landsliðsþjálfari í körfubolta, er ekki vinsælasti maðurinn hjá körfuboltaáhugamönnum eftir 77-74 tapið gegn Búlgaríu í undankeppni HM 2019 í Laugardalshöllinni á mánudagskvöldið.

Strákarnir fóru illa að ráði sínu á lokasprettinum og eiga nú undir högg að sækja í riðlinum en tapið á móti Búlgörum var ansi dýrt. Það er þó ekki bara tapið sem slíkt sem svíður stuðningsmenn Íslands heldur hvernig liðinu var stýrt undir lokin og þá sérstaklega fjarvera miðherjans Tryggva Snæs Hlinasonar í fjórða leikhluta.

Sjá einnig:Þú Trygg(v)ir ekki eftir á

Fannar Ólafsson, fyrrverandi landsliðsfyrirliði, gekk ekkert í kringum hlutina í kvöldfréttum Stöðvar 2 í gær aðspurður um ákvörðunina að geyma Risann úr Bárðardalnum á bekknum þegar að mest á reyndi.

„Ég er á því að þjálfarinn, eða þjálfarateymið, hafi gert stór mistök undir lokin á þessum leik, að spila Tryggva ekki meira [...] Ég skrifa þetta algjörlega á þjálfarann,“ sagði Fannar.

Tímabært að breyta?

Hann er langt frá því sá eini sem er óánægður með Pedersen sem sumir vilja hreinlega að verði leystur frá störfum. Umræða um leikinn skapaðist á Facebook-vegg Gunnars Örlygssonar, fyrrverandi leikmanns Íslandsmeistaraliðs Njarðvíkur sem hætti sem formaður í Ljónagryfjunni á síðasta ári.

„Athyglisvert að Tryggvi hafi einungis fengið tvær mínútur í lokaleikhlutanum í gær. Hann var búinn að trufla „aðra hverja sókn Búlgarana með einum eða öðrum hætti“ þann tíma sem hann var inn á. Skil ekki þessa ákvörðun þjálfaranna sem hugsanlega kostaði okkur sigurinn í gær. Búlgarar gengu á lagið um leið og stóri maðurinn var settur á bekkinn,“ segir Gunnar.

Hann furðar sig líka á því að Ólafur Ólafsson, leikmaður Grindavíkur, hafi ekki fengið stærra tækifæri en hann er með „yfirburðargetu líkamlega sem án efa gæti nýst báðum megin á vellinum“ að sögn Gunnars. 

Haukur Helgi Pálsson, einn besti körfuboltamaður þjóðarinnar, sem Gunnar fékk til Njarðvíkur fyrir tveimur árum, var orðinn mjög þreyttur og haltur á velli en spilaði á meðan Ólafur sat á bekknum.

„Heilt yfir frábær leikur hjá okkar mönnum en léleg stjórnun af bekknum og vakna nú spurningar hvort tímabært sé að skoða breytingar á þjálfarateyminu,“ segir Gunnar.

Tryggvi átti að spila meira

Þó svo að lítil ást ríki almennt á milli Suðurnesjamanna þegar kemur að körfubolta sameinast risarnir þrír; Njarðvík, Keflavík og Grindavík, á veggnum hans Gunnars. Þar skilur enginn hvað Craig Pedersen gekk til.

Keflavíkurinn Margrét Sturlaugsdóttir, sem er fyrrverandi Íslandsmeistari og síðar þjálfari Keflavíkur og aðstoðarþjálfari kvennalandsliðsins, tekur undir með Gunnari.

Hún hafði heldur engan húmor fyrir sérfræðiáliti Pavels Ermolinskijs, landsliðsmanns sem var í settinu hjá RÚV, en hann sagði að það skipti engu máli hver væri inn á vellinum þegar að landsliðið væri að spila.

„Undarleg ákvörðun og pínlegt að hlusta á Pavel segja að það skipti engu máli hverjir séu inná. Síðan hvenær? Tryggvi átti að spila meira í 4. leikhluta og þjálfarateymið klikkaði. Takk Gunni fyrir að þora að benda á þetta,“ segir Margrét.

Martin hefði misst af framlengingu

Forkálfar af Vestfjörðum og suðurlandi blanda sér líka í umræðuna en Guðjón M. Þorsteinsson, fyrrverandi formaður KFÍ, segir þetta „algjörlega óskiljanlegt“ og Gylfi Þorkelsson , formaður FSu, segir það reginskandal að vera með draghaltan leikmann inn á í landsleik. Vísar hann þar til Hauks Helga Pálssonar.

Grindvíkingurinn Guðmundur Bragason, leikjahæsti landsliðsmaður Íslands frá upphafi, tekur undir með hinum stórlöxunum af Suðurnesjunum þó hann vilji ekki dæma um hort tímabært sé að skipta um þjálfara. Hann segir þó margt skrítið við þennan leik.

„[Það ] þarf að treysta fleirum svo við höfum ekki dauðþreytta menn í 4 leikhluta. Skil ekki skiptingarnar í 4. leikhluta, nota Tryggva meira, Haukur orðinn þreyttur og haltraði í restina. Martin hafður inná með fjórar villur þegar þurfti að brjóta, hann hefði misst af framlengingu ef henni hefði verið náð!“ segir Guðmundur Bragason.