Ekki er ofsagt að segja að nú bulli og kraumi og við að sjóða uppúr víða innan vébanda VG eftir að Vísir greindi frá því að þingflokkurinn hafi samþykkt að ganga til formlegra stjórnarmyndunarviðræðna við Sjálfstæðisflokkinn og Framsókn. Þess má víða sjá stað á Facebook og Twitter.

Víst er að margir kjósenda Vinstri hreyfingarinnar töldu sig ekki vera að kjósa flokkinn uppá þau býtti að með því væri verið að stuðla að því að Sjálfstæðisflokkurinn væri eftir sem áður við völd.

Ég, sem kaus VG: pic.twitter.com/cHSjU3Zcsp

— Haukur Viðar (@hvalfredsson) November 13, 2017

Og, í raun höfðu kjósendur enga ástæðu til að telja svo vera. Nú er til þess að gera nýlegur pistill sem þingmaður VG, Kolbeinn Óttarsson Proppé, skrifaði og birti á Vísi, farinn á flug í netheimum. Pistillinn birtist 20. september og þar segir meðal annars:

„Okkur gefst nú einstakt tækifæri til að sýna í verki hver skoðun okkar er á stjórnarháttum Sjálfstæðisflokksins. Flokkurinn hefur meira eða minna haldið um valdataumana síðustu áratugi og skapað þá menningu samtryggingar og leyndarhyggju sem við getum nú gengið á hólm við. Og þegar Sjálfstæðisflokkurinn fer nú að tala um stöðugleika og nauðsyn þess að hafa styrka forystu, vil ég biðja ykkur að hafa í huga að síðustu þrjár ríkisstjórnir sem hann hefur átt aðild að hafa hrökklast frá völdum.“

Kolbeinn er einn þeirra þingmanna sem samþykkti að ganga til formlegra viðræðna við Sjálfstæðisflokkinn um myndun ríkisstjórnar. Og keppast menn við að rifja upp svigurmæli í garð Sjálfstæðismanna úr röðum VG nú um stundir.

Í aðdraganda kosninga lánuð ýmsir nafn sitt á auglýsingu þar sem segir: „Við teljum að Katrín Jakobsdóttir sé best til þess fallin að veita nýrri ríkisstjórn forystu.“ Ekki er loku fyrir það skotið en fullvíst má telja að þetta sé ekki forystan sem menn sáu fyrir sér.

Þannig segist einn þeirra, Eiríkur Rögnvaldsson prófessor í íslensku, vissulega hafa skrifað uppá það fyrir kosningar ... „að ég treysti Katrínu Jakobsdóttur best til að veita nýrri ríkisstjórn forystu. Það er enn mín skoðun. En ég sagði líka að enginn heiðarlegur flokksforingi og flokkur gæti farið í stjórn með Sjálfstæðisflokknum eða Miðflokknum - það væri siðferðilega ekki verjandi. Það er líka enn mín skoðun.“

Hér fyrir neðan má orðsendingar frá ýmsum sem eru sannarlega ekki kátir með nýjustu tíðindi, þeirra á meðal flokksbundnir og jafnvel frambjóðendur flokksins.

Ég kaus femínískasta flokkinn sem í boði var eftir #höfumhátt og femínískar byltingar undanfarinna ára. Ég bara trúi því ekki að sá flokkur ætli svo að mynda ríkisstjórn með stjórnmálafólkinu sem kom verst af öllum fram við þolendur.

— Sóley Tómasdóttir (@soleytomasar) November 13, 2017

Hér er hægt að skrá sig í Samfylkinguna: https://t.co/vRy9AcNpt5

— Samfylkingin (@Samfylkingin) November 13, 2017

Ég skráði mig í fyrsta sinn í flokk fyrir nýafstaðnar kosningar. Nú virðist ég ætla að fá það rækilega í kollinn. Bjarni Ben er hrappur, punktur.

Fuck samstarf við D.

Þjónn, það situr vinstriflokkur í súpunni minni.

— KØTT GRĀ PJE (@KottGraPje) November 11, 2017