Bíll með þremur innanborðs fór í höfnina

Bíll með þremur innanborðs fór fram af bryggjunni á Árskógsströnd í Eyjafirði og í sjóinn síðdegis í dag. Búið er að ná öllum úr bílnum.

Um klukkan 17:30 í dag fékk lögreglan á Norðurlandi eystra tilkynningu um alvarlegt umferðarslys. Viðbragðsaðilar voru kallaðar út og hafa þeir aðstoðað lögreglu á vettvangi á bryggjunni á Árskógsströnd.

Verið er að að flytja þá sem lentu í sjónum á sjúkrahúsið á Akureyri. Þá var einnig óskað eftir aðstoð Landhelgisgæslunnar og viðbragðsaðila fyrir sunnan en búið var að ná aðilum úr bifreiðinni áður en til þess kom.

Ekki er grunur um að neitt saknæmt hafi átt sér stað. Nánari tildrög slyssins liggja ekki fyrir en rannsókn málsins heldur áfram, að því er segir á Facebook-síðu lögreglunnar á Norðurlandi eystra.