Rafleiðni sveiflaðist upp og niður í nótt

Rafleiðni í vatni við upptök Jökulsár á Fjöllum við norðanverðan Vatnajökul sveiflaðist upp og niður í nótt, en samkvæmt upplýsingum Veðurstofunnar núna undir morgun gæti það stafað af truflunum af krapa eða aur.

Jarðvísindamenn ætla að fljúga yfir svæðið í dag ef veður og skyggni leyfa en rafleiðnin hefur mælst mun hærri en venjulegt er á þessum árstíma.

Engin neðanjarðarórói hefur mælst og skjálftavirkni á svæðinu hefur verið með venjulegum hætti og vatnshæðin í fljótinu hefur ekki aukist.

Veðurstofan, Almannavarnir , Jarðvísindastofnun og fleiri fylgjast grannt með framvindu mála á svæðinu, en á þessari stundu eru ekki vísbendingar um að hlaup sé í vændum í fljótinu, sem rennur til sjávar í Öxarfirði.

Fólk er þó beðið að sýna aðgát við upptök árinnar vegna mögulegs gasútstreymis.