Norsk handboltastjarna fetar í fótspor Hörpu Þorsteins

Þórir Hergeirsson valdi línumanninn Heidi Löke í HM-hópinn sinn í gær sem er í sjálfu sér ekkert skrýtið enda er Löke búin að vera einn besti línumaður heims í meira en áratug.

Það sem vekur hinsvegar athygli við þetta val er að Heidi Löke er nýbúin að eignast barn og það bjuggust því ekki margir við því að sjá Löke á þessu heimsmeistaramóti.

Þórir tekur þennan 35 ára gamla línumann með á HM í Þýskalandi og hún tekur fjögurra ára gamlan son sinn með. Heidi Löke mætir því á stórmót með kornabarn alveg eins og íslenska knattspyrnukonan Harpa Þorsteinsdóttir gerði á EM í Hollandi síðasta sumar.

Harpa fékk þá mikla athygli frá bæði innlendum og erlendum fjölmiðlum enda með soninn Ými með sér sem hún eignaðist tæpum fimm mánuðum fyrr.  

„Oscar kemur með á HM. Það er engin spurning um það,“ sagði Heidi Löke í viðtali við Dagbladet.  Oscar kom í heiminn 30. júní og varð Heidi þá móðir í annað sinn. Hún á einnig soninn Alexander sem er 10 ára gamall.

Bæði Ýmir og Oscar ná því að fara með mömmu sinni á stórmót áður en þeir héldu upp á fimm mánaða afmælið sitt.

Heidi Löke hrósar norska handboltasambandinu fyrir að hjálpa henni að gera þetta mögulegt.

„Þetta snýst ekki aðeins um að ég komi mér í HM-form. Þetta snýst líka um það að ég á nú barn og þetta var kapall sem þurfti að ganga upp. Oscar er bara fjögurra mánaða gamall og ég verð að vera mamma líka. Ég er virkilega ánægð með hvernig landsliðið hefur leyst þetta,“ sagði Heidi.

Oscar og sambýlismaður hennar Björn fá eigið herbergi á liðshótelinu.

Heidi Löke spilar nú með Storhamar IL í Noregi en hún hafði áður spilað með ungverska liðinu Györ í sex ár eða frá 2011 til 2017.

Heidi Löke hefur unnið níu verðlaun á stórmótum með norska landsliðinu, sex gullverðlaun, ein silfurverðlaun og tvenn bronsverðlaun. Hún missti af Evrópumeistaratitlinum 2016 vegna þess að hún var í barnsburðarleyfi.