Forstjóri Skeljungs: Tímasetningin hefur legið fyrir í langan tíma

Henrik Egholm, forstjóri Skeljungs, segir að tímasetning kaupréttarins sem hann nýtti sér í dag hafi legið fyrir í langan tíma. Tímasetningin hafi ekkert með boðaða hagræðingu Skeljungs að gera.

Þetta kemur fram í yfirlýsingu frá Egholm sem send var á fjölmiðla eftir að greint var frá því að hann, ásamt forstjóra Magn F/O, dótturfyrirtækis Skeljungs í Færeyjum, hefðu í dag nýtt sér kauprétt í Skeljungi á genginu 2,8. Nokkrum klukkustundum síðar seldi Egholm stærstan hlut þeirra bréfa sem hann keypti á genginu 7,3, markaðsgengi Skeljungs.

Hagnaðist hann um 105 milljónir og forstjóri Magn F/O um 117 milljónir. Í yfirlýsingunni segir Egholm að viðskiptin séu í samræmi við kaupréttarsamkomulag sem gert var í aprílmánuði árið 2014, en Egholm var forstjóri Magn F/O áður en hann tók nýverið við sem forstjóri Skeljungs.

Þetta segir Egholm að hafi komið fram í í skráningarlýsingu félagsins frá nóvember 2016, og tilkynningu til kauphallarinnar þann 22. febrúar 2017.

„Tímasetning kaupréttanna hefur því legið fyrir í langan tíma og markaðsaðilar hafa fengið aðgang að öllum verðmótandi upplýsingum sem fyrir liggja. Það skal áréttað, að umtalsvert magn hlutanna sem ég keypti í Skeljungi er enn í minni eigu – að markaðsvirði um 12 milljónir króna - og engin áform eru uppi um að selja þá,“ segir í yfirlýsingu Egholm.

Fyrir helgi var tilkynnt um hagræðingaráform Skeljungs. Sem liður í því var 29 starfsmönnum sagt upp, bæði starfsmönnum á skrifstofum þess eða afgreiðslustöðvum. Þá voru svið sameinuð, stjórnunarstöðum fækkað og áform kynnt um að hætta notkun á vörumerkinu Skeljungur og einbeita sér að rekstri Orkunnar.

„Tímasetning minna viðskipta með hluti í félaginu hefur ekkert að gera með boðaða hagræðingu, heldur stýrist hún af af ákvæðum í kaupréttarsamningi,“ segir í yfirlýsingu Egholm ásamt því að breytingunum sé ætlað styrkja Skeljung á hörðum samkeppnismarkaði.

„Sem forstjóri ber ég ábyrgð á rekstri Skeljungs. Allar rekstrarákvarðanir mínar miða að því einu, að bæta afkomu félagsins, bregðast við breytingum á markaði og tryggja samkeppnishæfni Skeljungs. Stefnulegar ákvarðanir mínar hafa ekkert að gera með kaup og sölu hlutabréfa, hvorki mín eigin né annarra,“ segir í yfirlýsingu Egholms sem lesa má hér fyrir neðan.

Yfirlýsing forstjóra Skeljungs í heild sinni

„Viðskipti mín með hluti í Skeljungi eru í samræmi við kaupréttarsamkomulag sem gert var í aprílmánuði árið 2014, og fjallað er um í skráningarlýsingu félagsins frá nóvember 2016, og tilkynningu til kauphallarinnar þann 22. febrúar 2017. Tímasetning kaupréttanna hefur því legið fyrir í langan tíma og markaðsaðilar hafa fengið aðgang að öllum verðmótandi upplýsingum sem fyrir liggja. Það skal áréttað, að umtalsvert magn hlutanna sem ég keypti í Skeljungi er enn í minni eigu – að markaðsvirði um 12 milljónir króna - og engin áform eru uppi um að selja þá.

Í síðustu viku voru kynntar ákvarðanir um breytingar á skipulagi Skeljungs og hagræðingu í rekstrinum. Þeim breytingum er ætlað að styrkja fyrirtækið á hörðum samkeppnismarkaði, en einnig eru þær liður í því, að auka verðmæti Skeljungs til lengri tíma. Stjórnendur fyrirtækisins munu halda áfram að bæta reksturinn og festa Skeljung í sessi sem leiðandi afl á markaði sem er að breytast. Tímasetning minna viðskipta með hluti í félaginu hefur ekkert að gera með boðaða hagræðingu, heldur stýrist hún af af ákvæðum í kaupréttarsamningi.

Sem forstjóri ber ég ábyrgð á rekstri Skeljungs. Allar rekstrarákvarðanir mínar miða að því einu, að bæta afkomu félagsins, bregðast við breytingum á markaði og tryggja samkeppnishæfni Skeljungs. Stefnulegar ákvarðanir mínar hafa ekkert að gera með kaup og sölu hlutabréfa, hvorki mín eigin né annarra.“