42 meistaratitlar í einu liði og að auðvitað sigur í Ljónagryfjunni í gær

B-lið Njarðvíkur komst áfram í sextán liða úrslit Maltbikarsins í gærkvöldi eftir fimm stiga sigur á 1. deildarliði Skallagríms í Ljónagryfjunni í Njarðvík, 100-95.

Þetta Njarðvíkurlið er hinsvegar ekkert venjulegt b-lið enda ætti náttúrulega vera flokkað sem g-lið eða goðsagnalið.

Þegar búið er að leggja saman alla Íslands- og bikarmeistaratitla tólf manna hópsins þá er talan komin upp í 42 meistaratitla. Það var því nóg af sigurvegurum í Njarðvíkurbúningnum í gær og því kannski ekkert skrýtið að þeir hafi fagnað sigri.

Goðsagnir liðsins koma þó ekki aðeins úr Njarðvík heldur af öllum Suðurnesjunum. Margfaldir meistarar frá Keflavík og Grindavík eru líka í þessu magnaða liði.

Gömlu karlarnir sýndu líka frábær tilþrif í þessum leik en liðið mætti þarna kanalaust á móti liði sem hafði 32 stiga mann í Zaccery Alen Carter.

Keflvíkingurinn Magnús Þór Gunnarsson og Njarðvíkingurinn Páll Kristinsson fóru fyrir sínu liði en Keflvíkingurinn Gunnar Einarsson og Grindvíkingurinn Páll Axel Vilbergsson voru líka öflugir. Allt eru þetta menn sem voru landsliðmenn og í lykilhlutverkum í meistaraliðum.

Magnús Þór skoraði 26 stig í leiknum en hann setti niður sex þriggja stiga skot og gaf að auki 5 stoðsendingar.

Páll var með 24 stig og 10 fráköst auk þess að fiska tíu villur á Borgnesinga. Gunnar skoraði 12 stig og Páll Axel var með 8 stig og 19 fráköst.

Þjálfari liðsins er síðan Halldór Rúnar Karlsson sem vann sjálfur sex stóra titla á ferlinum, fjóra Íslandsmeistaratitla (Keflavík 1999, Njarðvík 2001, 2002 og 2006) og svo tvo bikarmeistaratitla (Njarðvík 2002 og 2005).  Það kemur titlafjöldanum upp í 48.

 



Íslands- og bikarmeistaratitlar leikmanna í liði Njarðvíkur-b 2017-18:

Gunnar Einarsson 9

6 sinnum Íslandsmeistari með Keflavík (1997, 1999, 2003, 2004, 2005, 2008)

3 sinnum bikarmeistari með Keflavík (1997, 2003, 2004)

Páll Kristinsson 8

4 sinnum Íslandsmeistari með Njarðvík (1994, 1995, 1998, 2002)

3 sinnum bikarmeistari með Njarðvík (1999, 2002, 2005)

1 sinni bikarmeistari með Grindavík (2006)

Magnús Þór Gunnarsson 7

4 sinnum Íslandsmeistari með Keflavík (2003, 2004, 2005, 2008)

3 sinnum bikarmeistari með Keflavík (2003, 2004, 2012)

Arnar Freyr Jónsson 5

3 sinnum Íslandsmeistari með Keflavík (2003, 2004, 2005)

2 sinnum bikarmeistari með Keflavík (2004, 2012)

Sævar Garðarsson 5

2 sinnum Íslandsmeistari með Njarðvík (2001, 2002)

2 sinnum bikarmeistari með Njarðvík (1999, 2002)

1 sinni bikarmeistari með Grindavík (2000)

Páll Axel Vilbergsson 3

2 sinnum Íslandsmeistari með Grindavík (1996 og 2012)

1 sinni bikarmeistari með Grindavík (2006)

Hjörtur Hrafn Einarsson 1

1 sinni Íslandsmeistari með Njarðvík (2006)

Rúnar Ingi Erlingsson 1

1 sinni Íslandsmeistari með Njarðvík (2006)

Grétar Már Garðarsson 1

1 sinni Íslandsmeistari með Njarðvík (2002)

Arnar Þór Smárason 1

1 sinni bikarmeistari með Njarðvík (2002)

Ólafur Aron Ingvason 1

1 sinni bikarmeistari með Njarðvík (2005)