Ekki náð að ræða við manninn sem fór í Ölfusá

Lögreglan á Suðurlandi hefur enn ekki náð að ræða við manninn sem fór í Ölfusá í gær. Oddur Árnason, yfirlögregluþjónn á Suðurlandi segir þó að atvik máls séu þannig að maðurinn hafi ætlað sér ofan í ána. Fjölmörg vitni hafa gefið sig fram við lögreglu vegna málsins.

„Það sem mér finnst standa upp úr er að það líða níu mínútur frá því að björgunarsveitin er kölluð út og þangað til maðurinn er kominn um borð í bátinn. það finnst mér vera magnaður andskoti og sýnir hvað þau geta gert,“ segir Oddur í samtali við Vísi.

Oddur segir að maðurinn hafi komið að brúnni að vestan, mögulega frá höfuðborgarsvæðinu.

„Hann hefur ekki verið til viðtals og verður það ekki alveg á næstunni til að upplýsa um ferðir sínar.“

Mörg vitni gefið sig fram

Hann segir að strax í gærkvöldi hafi margar ábendingar vegna málsins borist lögreglu.

„Við auglýstum eftir vitnum í gær og það var töluverðurfjöldi vitna sem gaf sig fram, bæði á vettvangi og á Facebook og í tölvupósti. Það er verið að heyra í þeim hvað þau hafa um það að segja.“

Maðurinn ók bíl á brúarhandrið Ölfusárbrúar og stökk þaðan út í ána í gærkvöldi. Hann var í ánni í fimmtán til tuttugu mínútur áður en björgunarmenn náðu honum á land. Þá hafði hann borist um einn og hálfan kílómetra með straumnum. Talið er að hann hafi verið nokkrar mínútur í kafi. 

Meðlimir Björgunarfélags Árborgar voru að funda í húsakynnum björgunarfélagsins við Árveg, sem er við Ölfusá, og voru því snöggir til þegar tilkynningin barst. Húsið er 600-700 metra austan af brúnni.

Hann var meðvitundarlaus þegar björgunarmenn náðu honum á land og þurfti að beita endurlífgunartilraunum. Maðurinn andaði sjálfur þegar farið var með hann um borð í þyrlu Landhelgisgæslunnar sem flutti hann á bráðamóttökuna í Fossvogi.