„Þetta var mögnuð björgun“

„Þetta var mögnuð björgun,“ segir Styrmir Sigurðsson, yfirmaður sjúkraflutninga á Suðurlandi, um vinnu björgunarsveitarfólks við erfiðar aðstæður eftir að maður stökk út í Ölfusá um klukkan átta í kvöld.

Maðurinn ók bíl á brúarhandrið Ölfusárbrúar og stökk þaðan út í ána, að því er fram kemur í tilkynningu frá lögreglunni á Suðurlandi um málið. 

Styrmir segir manninn hafa verið í ánni í fimmtán til tuttugu mínútur áður en björgunarmenn náðu honum á land. Þá hafði hann borist um einn og hálfan kílómetra með straumnum. Talið er að hann hafi verið nokkrar mínútur í kafi.

Hann var meðvitundarlaus þegar björgunarmenn náðu honum á land og þurfti að beita endurlífgunartilraunum. Maðurinn andaði sjálfur þegar farið var með hann um borð í þyrlu Landhelgisgæslunnar sem flutti hann á bráðamóttökuna í Fossvogi.

Var sjálfur á leið yfir brúna

Styrmir var sjálfur ekki á vakt þegar tilkynning um málið barst viðbragðsaðilum um áttaleytið í kvöld heldur á ferðinni í bíl yfir Ölfusárbrú.  Hann lagði bíl sínum hjá Pylsuvagninum á Selfossi og byrjaði að fylgja manninum eftir.

Vitni sögðu manninn hafa ekið á miklum hraða að brúnni áður en hann stökk út í ána.

„Menn löbbuðu niður eftir ánni, lögregla og sjúkraflutningamenn, til að halda sjónum á honum þar til bátarnir komu. Það tókst frábærlega,“ segir Styrmir.

Fundur björgunarfélagsins mikið happ

Meðlimir Björgunarfélags Árborgar voru að funda í húsakynnum björgunarfélagsins við Árveg, sem er við Ölfusá, og voru því snöggir til þegar tilkynningin barst. Húsið er 600-700 metra austan af brúnni.

„Það var mikið happ að þessi fundur var hjá björgunarfélaginu. Þeir voru óhugnanlega fljótir að koma bátunum á flot. Þetta voru bara örfáar mínútur sem er grjótmagnað viðbragð. Þessi straumvatnsbjörgunarflokkur hjá Björgunarfélagi Árborgar er einn sá besti hér á landi og þó víðar væri leitað. Þeir æfa mjög stíft hér í kringum straumvötnin og það er er að skila sér alveg greinilega,“ segir Styrmir.

Mikill erill hefur verið hjá viðbragðsaðilum á Suðurlandi því fyrr í kvöld höfðu sjúkraflutningamenn sinnt útkalli í uppsveitum þar sem maður hafði klemmst á milli tveggja dráttarvéla.

Var þyrla Landhelgisgæslunnar nýbúin að flytja hann í bæinn þegar tilkynningin barst um slysið við Ölfusárbrú.

Þeir sem urðu vitni að akstri umræddrar bifreiðar fyrir slysið á Ölfusárbrú eru beðnir að hafa samband við lögregluna á Suðurlandi á Facebook-síðu hennar, í tölvupóstfangið sudurland@logreglan.is eða í síma 444 2000.

Uppfært klukkan 0:05

Búið er að opna fyrir umferð um Ölfusá.