Ágústspá Siggu Kling - Bogmaðurinn: Nýtur þess af allri sálu þinni að elska

Elsku Bogmaðurinn minn, þegar þú ert ákveðinn og sýnir ákefð við að gera og breyta í kringum þig þá færðu flesta í lið með þér, en þegar þú sérð að þú þarft að gera flestalla hluti sjálfur og enginn er tilbúinn til að ýta þér áfram þá missirðu kraftinn.

Ég hef skrifað tvær bækur; Orð eru álög sem varð metsölubók og Töfraðu fram lífið sem varð ekki metsölubók, en þá keypti ég þúsund eintök af henni, og þá varð hún metsölubók. Þetta segir þér að þú þarft að treysta á þig og þínar hugmyndir og koma þér áfram af sjálfsdáðum, það er eina leiðin.

Þú nýtur þess af allri sálu þinni að elska og markmið þitt er stundum að reyna að breyta þeim sem eru í kringum þig til þess að líf þeirra verði auðveldara og þar af leiðandi auðvitað þitt líka. En það er algerlega óvinnandi verkefni að breyta öðrum svo slepptu þeim persónum sem þú vilt breyta og leyfðu þeim að vera það sem þær vilja og elskaðu bara þá sem heilla þig og lokaðu á gallana.

Þessi skemmtilegi tími sem þú ert að fara inn í núna kennir þér að eflast og sýna öðrum hver er hinn sanni þú. Þú skorar á sjálfan þig að virkja líkamann og hugann og þú færð aukakraft til þess að búa til hina bestu útgáfu af þér. Þú hefur ofurnæman skilning á fólkinu sem þú elskar því þú hefur þann hæfileika að geta lesið í táknmál líkamans og þar af leiðandi ert þú ráðgjafi margra. Þú þolir alls ekki yfirborðskennd samskipti. Þótt þú elskir fjölbreytni og smá fjör í ástinni þá gerirðu þá kröfu að ástin sé hrein og bein og engir leikir séu til staðar.

Þið sem eruð á lausu eigið eftir að opnast meira og meira fyrir því að heiðarlegt samband sé það besta fyrir ykkur, en þú gefst upp eins og skot ef það er verið að ljúga að þér eða leika sér að þér og afar margir í þínu merki munu finna ástina svo sanna og svo rétta. Hins vegar getur verið dálítill óróleiki hjá þeim sem eru í sambandi og pirringur. Hugsaðu þá til baka og skoðaðu af hverju þú varðst ástfanginn af þessum einstaklingi, andaðu að þér þeim tilfinningum því tilfinningar eyðast aldrei, þær bara gleymast.

Með þínum ólýsanlegu persónutöfrum nærðu fram árangri til að leiðrétta kjör þín og koma öllu í jafnvægi. Ótrúlega góður tími er fram undan, þú ert að fara í rennibraut og þó þú vitir ekki alveg hvar hún endar eða hversu hratt þú ferð, slakaðu þá bara á og leyfðu því að gerast sem gerist.

Setningin þín er: Stólaðu á mig (Lean on me - Bill Withers)

Frægir Bogmenn: Ingvar E. Sigurðsson leikari, Björgvin Franz Gíslason leikari, Edda Heiðrún Backman leikkona, Regína Ósk Óskarsdóttir söngkona, Sigrún í Gyðja Collection, Steindi, Bryndís Ásmundsdóttir, leik- og söngkona, Jóhanna Vilhjálmsdóttir, fjallkona og leikkona, Logi Bergmann Eiðsson sjónvarpsmaður, Jói á Fabrikkunni, Sigga Dögg kynfræðingur, Hemmi, hársnillingur á Módus, Lovísa, hönnuður hjá Kjólar og konfekt.