Ágústspá Siggu Kling - Meyjan: Í ástinni þarftu öryggi, spennu og rómantík

Elsku Meyjan mín. Það er aldeilis búið að vera mikið uppgjör á þessu ári. Þú ert búin að horfast í augu við það sem þú hræðist og skora hræðsluna á hólm. Það býr samt í þér efi um að þú hafir gert rétt, kannski hefðirðu ekki átt að taka svona stórar ákvarðanir til að standa með því sem þig langar til að gera. Þessi skilaboð eiga líka við um næstu fjóra mánuði, trúðu því og treystu, þó að þér finnist hlutirnir ekki auðveldir, að það besta sem þú gerir er að standa með sjálfri þér og þínum ákvörðunum.

Þér er svo annt um orðspor þitt og hvað aðrir hugsa, en þú ert aldrei það sem aðrir hugsa. Þú ert og verður alltaf bara það sem er í þínum eigin huga, svo ef þú rífur þig niður fyrir það sem þú hefur valið, gefurðu sérstaklega færi á þér fyrir þá sem öfunda þig og bíta þig í hælinn. Þú vilt sýna örlæti og ástríki, kannski ekki á hefðbundinn hátt og þú vilt fela það hvað þú ert viðkvæm og blíð, og láta aðra halda að þú sért algjörlega ósigrandi.

Taktu niður grímuna og settu einlægni og gegnsæi í kringum þig, farðu úr brynjunni! Með því eflist krafturinn þinn og ást sem gefur þér þá færi á að bjóða þeim sem þú þráir inn í líf þitt. Þú stoppar þig svo oft með einstrengingshætti og vilt halda öllu því sem þér finnst til streitu og stoppar ekki í þrjóskunni. Ef þú hægir aðeins á þér og sleppir tökunum, og það er sko alls ekki líkt Meyjunni að gera, þá sérðu lífið þitt í miklu sterkari og fallegri litum og þá kemur í ljós að þú ert sigurvegari.

Þú skalt alveg sleppa því að mynda þér of sterkar skoðanir á fólki í kringum þig; að vera alveg viss um að þessi eða hinn hafi ekkert nógu gott til að bera og sé svona eða hinsegin. Það er lykillinn til þess að allt falli í ljúfa löð og þú finnir svo sannarlega að þú getur það sem þú hefur vonað og þráð. Í ástinni þarftu öryggi, spennu og rómantík en sættir þig samt við þó að lítið sé af öllu þessu.

Ágúst, september og október verður draumatími hjá þér, þú skalt sérstaklega taka eftir því hvað ágústmánuður segir við þig. Hann gefur þér verkefni sem þú býst ekki við og þú verður ekki alveg viss um hvernig þú munt snúa þér í stöðunni. Seinniparturinn í ágúst og september gefa þér svar um að það sem hefur verið að gerast eru bara óvæntar gjafir og meiri orka inn í líf þitt. Þú ert að starta nýjum hlutum á haustmánuðum sem eru spennandi, fylla huga þinn af gleði og keppnisskapi og þú finnur betri tilgang fyrir því sem þú ert að gera. Til hamingju með það!

Setningin þín er: Hæ, hó jibbí jey það er alltaf sautjándi júní

Frægar Meyjur: Ragna Lóa Stefánsdóttir íþróttakona, Manuela Ósk fyrirsæta, Björk Eiðsdóttir ritstýra, Andrea fatalistamaður, Claudia Schiffer fyrirsæta, Edda Björgvinsdóttir leikkona, Eva Dögg Sigurgeirsdóttir, ritstjóri og tískugúrú, Herdís Jóhannesdóttir athafnakona, Beyoncé Knowles söngkona, Gylfi Þór Sigurðsson, Eiður Smári Guðjohnsen, Sigrún Ósk Kristjánsdóttir sjónvarpskona, Annie Mist crossfittari, Logi Pedro Stefánsson tónlistarmaður, Selma Ragnars, fatahönnuður Íslands, Lalli Johns góðkunningi lögreglunnar, Sema Erla Serdar, baráttukona, Eydís Ósk hjúkrunarkona.