Óvenjumiklar sveiflur á gjaldeyrismarkaði um þessar mundir

Óvenjumiklar dagsveiflur hafa einkennt gjaldeyrismarkaðinn að undanförnu, að sögn Konráðs S. Guðjónssonar, hagfræðings í greiningardeild Arion banka.

Dæmi séu um að gengi krónunnar sveiflist um tvö til þrjú prósent innan dags. „Svo virðist sem hver og ein viðskipti með gjaldeyri á millibankamarkaði séu að færa verðið meira til en áður,“ segir hann í samtali við blaðið.

Gengi krónunnar hefur verið nokkuð sveiflukennt það sem af er ári, þó það hafi á heildina litið styrkst um rúm 4,5 prósent. 

Síðustu vikur hefur krónan hins vegar veikst umtalsvert eða um 5,8 prósent, samkvæmt gengisvísitölu, í júnímánuði. Sú þróun er þvert á væntingar greinenda sem höfðu flestir spáð umtalsverðri styrkingu gjaldmiðilsins samfara háannatíma í ferðaþjónustunni.

Konráð segir það blasa við að smæð gjaldeyrismarkaðarins hafi átt þátt í miklum gengissveiflum krónunnar síðustu vikur og mánuði. Krónan sé lítill gjaldmiðill og því geti lítil viðskipti haft áhrif á verðmyndun hennar frá degi til dags. Greiningardeildin hefur til að mynda bent á að velta með gjaldeyri á millibankamarkaði hafi verið 30 milljarðar króna í maí borið saman við 72 milljarða króna veltu á hlutabréfamarkaði á sama tíma.

Þessi litla velta með gjaldeyri valdi því enn fremur að sveiflur innan dags séu meiri nú en oft áður.

„Það útskýrir líka sveiflurnar að Seðlabankinn er ekki lengur jafn virkur á gjaldeyrismarkaði,“ útskýrir Konráð. 

„Hann hefur heldur haldið sig nokkuð til hlés og bregst ekki lengur eins mikið við sveiflum og áður. Meira frjálsræði í fjármagnsflutningum ýkir líka sveiflurnar. Svo virðist sem það hafi hreinlega verið nokkur titringur á markaðinum.“