Ástráður og Jóhannes með sama lögmann

Jóhannes Rúnar Jóhannsson hæstaréttarlögmaður hefur höfðað mál gegn íslenska ríkinu vegna embættisfærslu dómsmálaráðherra þegar ákveðið var að fara á svig við tillögu dómnefndar um hæfi dómara í Landsrétt og velja þess í stað fjóra úr hópi þeirra sem síður þóttu hæfir. Jóhannes Rúnar var metinn tólfti hæfastur af dómnefndinni en var einn fjögurra í tillögunni sem ekki var í endanlegri tillögu dómsmálaráðherra.

Áður hafði Ástráður Haraldsson, sem dómnefnd mat fjórtánda hæfastan, stefnt íslenska ríkinu vegna embættisfærslunnar. Þingfesting var í málinu í gær en það hefur hlotið flýtimeðferð hjá dómstólum. Þá var ákveðið að íslenska ríkið hefði frest til 3. júlí til að skila inn greinargerð vegna stefnunnar. Héraðsdómari í málinu er Kjartan Bjarni Björgvinsson, sem nýverið lauk störfum sem formaður og eini nefndarmaður rannsóknarnefndar Alþingis í rannsókninni á einkavæðingu Búnaðarbankans.

Ástráður og Jóhannes Rúnar eru með sama lögmann, Jóhannes Karl Sveinsson. Jóhannes Karl sendi stjórnskipunar- og eftirlitsnefnd umsögn um ákvörðun dómsmálaráðherra þar sem hann var harðlega gagnrýndur. Þá sagði hann í umsögninni að í uppsiglingu væri hneyksli sem kæmi til með að skapa ríkinu bótaábyrgð.

Jóhannes Rúnar segist í samtali við Fréttablaðið sömuleiðis hafa óskað eftir flýtimeðferð. Ekki sé búið að ákveða hvort stefnur lögmannanna verði ef til vill sameinaðar í eitt mál. „Þetta var alls ekki erfið ákvörðun. Hún hefur legið fyrir í lengri tíma en það er ágætt að segja frá henni núna,“ segir hann.

Í tilkynningu Jóhannesar vegna málshöfðunarinnar segir meðal annars: „Það er valdníðsla þegar stjórnvald misnotar opinbert vald með þeim hætti að ólögmæt og ómálefnaleg sjónarmið, svo sem vinátta, flokkshagsmunir, eða óvild, ráða ákvörðun þess.“