Fiskveiðilöggjöf verndi byggðir

Kallað er eftir því af þingmönnum að skerpt verði á ákvæðum fiskveiðistjórnunarlaga um byggðavernd. Núverandi ákvæði tryggi ekki þá byggðafestu sem gert var ráð fyrir í upphafi.

„Ég hef verið þeirrar skoðunar lengi að það standi upp á stjórnvöld að svara þeirri spurningu hvort, og með hvaða hætti, þau ætli að tryggja þá byggðafestu sem gert er ráð fyrir í lögunum,“ segir Páll Magnússon, þingmaður Sjálfstæðisflokksins og formaður atvinnuveganefndar.

Páll vísar meðal annars til hæstaréttardóms frá júní 2015 í máli Síldarvinnslunnar gegn Vestmannaeyjabæ. Þar var komist að þeirri niðurstöðu að forkaupsréttur sveitarfélaga næði aðeins til fiskiskipa sem stæði til að selja úr bæjarfélaginu en ekki til hlutabréfa eiganda fiskiskips.

Í kjölfar ákvörðunar HB Granda að færa landvinnslu á botnfiski frá Akranesi til Reykjavíkur hefur umræða um forkaupsrétt sveitarfélaga og byggðavernd losnað úr læðingi á ný.

„Mál HB Granda gerir það enn meira knýjandi að þessari spurningu sé svarað,“ segir Páll. Hann bendir á að í fiskveiðistjórnunarlögunum sé kveðið á um byggðafestuna auk þess að hana megi lesa úr anda laganna. Nauðsynlegt sé að breyta lögunum.

„Það þarf að vera eitthvert akkeri sem gerir það að verkum að aflaheimildir fljóti ekki viðstöðulaust úr byggðarlögum.

Það er ekkert í núverandi lagaumgjörð sem hindrar að allrar aflaheimildirnar séu færðar á einn stað, þess vegna til Reykjavíkur.“

„Við í Framsóknarflokknum höfum verið fylgjandi því að það verði leitað leiða til að styrkja forkaupsrétt sveitarfélaga. Við teljum eðlilegt að þetta verði skoðað,“ segir Gunnar Bragi Sveinsson, fyrrverandi sjávarútvegsráðherra.

„Þá má líka velta því fyrir sér hvort það megi lækka kvótaþakið þannig að það séu fleiri um kvótann. Þetta er samt alltaf flókið mál. Það má heldur ekki fara í aðgerðir sem draga úr þróun og nýsköpun í sjávarútvegi. Það má velta öllu upp en ég er á móti því að það verði gerðar stórar breytingar á kerfinu sem gera það að verkum að það verði ekki eins skilvirkt og það er í dag,“ segir Gunnar Bragi.

Þorgerður Katrín Gunnarsdóttir, sjávarútvegs- og landbúnaðarráðherra, sagði við Fréttablaðið í gær að unnið væri að skipun nefndar um fyrirkomulag gjaldtöku af auðlindinni. Nefndin verður skipuð fulltrúum allra þingflokka og er stefnt að því að hún skili tillögum á næsta þingi.