Fjárfesti í íbúðinni sem allir gerðu grín að

Berglind Pétursdóttir vildi hvergi annars staðar búa en í miðbænum og keypti ásamt fyrrum sambýlismanni sínum litla íbúð á fyrstu hæð á Hverfisgötu sem þau gerðu fokhelda og endurbyggðu á nokkrum mánuðum.

Á meðan á framkvæmdum stóð bjuggu þau á Hótel mömmu og starfsmenn byggingarvöruverslanna og IKEA voru farnir að þekkja þau með nafni. Litla ógeðslega íbúðin er orðin að nútíma bleikri perlu í hjarta miðbæjarins og hefur nærri tvöfaldast að verðmæti á stuttum tíma.

„Það kom enginn annar staður en miðbærinn til greina þegar íbúðakaup voru loksins ákveðin,“ segir Berglind, en íbúðin að Hverfisgötu er hennar fyrsta íbúð. Kaupin voru fjármögnuð með íbúðaláni hjá Landsbankanum, yfirdrætti og spurningaspili.

 

„Ég og fyrrum sambýlismaður minn vorum bæði í fullri vinnu á daginn og á kvöldin unnum við saman að verkefni, en við gerðum spurningaspil saman. Tekjurnar af því gerðu okkur kleift að eiga fyrir útborgun, ásamt hellings yfirdrætti. En ég hef svo sem alltaf verið í þúsund aukavinnum og verkefnum,“ segir Berglind.

Berglind var búin að vera á leigumarkaðinum síðan hún var tvítug.

„Ég var í Listaháskólanum og bjó heima hjá foreldrum mínum. Síðan þegar ég eignaðist son minn, fannst mér ekki hægt að búa heima lengur og fór að leigja. Við leigðum íbúð á Bergstaðastræti og leigusalarnir bjuggu á hæðinni fyrir ofan. Síðan fluttu þeir annað og við fluttum upp í þeirra íbúð,“ segir Berglind.

Leigan var 200.000 kr. á mánuði og átti að hækka í 230.000 kr. eftir að Berglind flutti út.

Hætti við nám erlendis og keypti frekar íbúð

Fasteignakaup voru ekki alveg efst á lista hjá Berglindi þegar íbúðin var keypt. Hún var á leiðinni til Manchester í nám í stafrænni verkefnastjórnun (Digital Media Management) og var búin að kaupa flugmiðann út.

„Í dag sér ég  ekki eftir að hafa sett námið á frest og fjárfest í fasteign í staðinn,“ segir Berglind.

Þegar ákvörðun var tekin um að kaupa fasteign í stað þess að leggja land undir fót og fara í nám erlendis byrjaði Berglind á að skoða fasteignir sem auglýstar voru til sölu á netinu.

Margir vina hennar voru einnig í húsnæðishugleiðingum á sama tíma. Ein eign var til umræðu í bæði vinahóp hennar og í vinnunni, íbúðin sem Berglind býr í í dag.

„Það voru bókstaflega allir að gera grín að þessari íbúð, enda var hún í frekar slæmu ástandi. Svo einn daginn sagði ég: „hvað ef við kaupum bara þessa ógeðslegu íbúð?“, enda var hún mjög ódýr og ég vissi það að það var mikil uppbygging í gangi á þessu svæði,“ segir Berglind.

Íbúðin fékkst á 25 milljónir fyrir einu og hálfu ári síðan.

„Ári seinna fékk ég tilboð í hana upp á 52 milljónir, sem að var auðvitað fráleitt verð, enda gekk það tilboð ekki eftir,“ segir Berglind, „í dag er íbúðin metin á 42 milljónir.“

Í stað þess að flytja í íbúðina í því ásigkomulagi sem hún var í við kaupin, var ákveðið að ráðast strax í breytingar á íbúðinni, „enda var alveg kominn tími á að endurnýja allt saman,“ segir Berglind. Afhending var á Þorláksmessu og tveimur dögum síðar var hafist handa við að gera íbúðina fokhelda og í sex mánuði bjó Berglind hjá foreldrum sínum.

„Það var gott að eiga húsasmíðameistara að í fjölskyldunni ásamt frændum.“

Ótal ferðir í IKEA

Framkvæmdirnar kostuðu blóð, svita og tár. Og ótalmargar ferðir í helstu byggingavöruverslanir höfuðborgarsvæðisins og IKEA liggja að baki.

„Ég lét örugglega teikna fyrir mig 700 hugmyndir í eldhúsdeildinni í IKEA, en svo enduðum við bara með einfalda innréttingu.“

Bleiki liturinn setur mark sitt á íbúðina hér og þar, meðal annars inn á baði, en flísarnar þar fundust eftir mikið þramm um allar flísabúðir Reykjavíkur.

„Það rennur stundum á mig bleikt æði og ég náði að fá í gegn bæði bleikar flísar inni á baði og einn bleikan vegg í eldhúsinu. Baðflísarnar sáum við þegar við fórum út að borða á Taco-barnum á Hverfisgötu. Eftir mikla leit fundum við hvar þær voru til sölu og pöntuðum eins,“ segir Berglind alsæl með fyrstu íbúðina sína.



Þetta var saga Berglindar, hvernig viltu að þín saga verði? Pantaðu ráðgjöf og komdu til okkar og gerðu þitt plan.



Greinin er kostuð af Íslandsbanka en hún er hluti af Það er hægt, verkefni bankans um fyrstu kaup á fasteign.